大鄉里出屯門市中心─迷路 ing~~

喺屯門住咗十幾年，喺市中心“葡”咗十幾年，今日竟然迷路，哈~~~

約咗畫班同學仔喺美孚早茶，之後一個人落屯門買 under，再唔買就全部變晒 T-back 喇，去到屯門吉之島，嘩~嘩~嘩~裝修完之後二樓連入口都做埋舖位，終於搵到入口，但裏面啲 counter 又全部走晒樣，行晒二樓全場都搵唔到內衣部，口在路邊要問食蕉叔叔，原來搬咗落一樓，以前擺床上用品嗰個位，嘩~~內衣部駛唔駛搞到咁“up dup”呀，幾種品牌堆埋一齊，多個人行都阻手阻腳，算，拿拿聲買完走人。

雖然十一點幾至嘆完早茶，但點幾又開始餓，十幾年冇幫襯過新墟嗰間粥舖，粥舖旁嘅金舖又冇埋，但警車依然好盡職日日駐守喺呢個位，只因成條街都係金舖。

去西鐵站途中嘅新墟街市，又係久遺了十幾年囉~

新墟街市旁的仁愛堂，以前阿仔喺度學游水，有暖水池架~
遠方興建中嘅建築物位置前身係“新發邨”，而家係樓高四十層嘅住宅~

自家製禮物袋

自家製禮物袋，因為搵唔到啱大細又啱心水嘅布袋，又諗可否用禮物紙做一個，點知樓下文具店冇我想要嘅禮物紙，買咗呢種比較硬嘅網狀包裝材料，絲帶原本係買嚟綁蝴蝶結，又因為網狀材料太硬，用雙面膠紙都唔掂，唯有用絲帶一味靠黐，終於做到袋形，但點封口呢？如果可以整個紐扣就好，靈機一觸諗起之前7仔嘅吊飾，搞掂。
至於 Connie 嗰個，因為唔係自家製，自動忽略。

其實今次禮物早於兩個月前就開始諗，見到阿仔砌俾女友嘅音樂盒，又係靈機一觸，女士們日常返工都有好多手飾，咁就不如整個 lego 盒仔啦，當然呢堆 lego 都係拆散咗嘅盒裝 lego，如果用嚟砌咗其他嘢咁就砌唔返原裝嗰副，但呢堆材料平時分類放好又唔係砌，實際上冇乜用，但如果要砌起嚟再買料又會好貴，總之就係“雞肋”一堆，雖然砌好盒仔，但最終都冇送俾廖太。

體操世錦賽男團決賽，中國隊在對手出現較多失誤的情況下奪冠，雖然說是僥幸，但眼看日本隊接連不斷的失誤，可否說成中國隊的心理質素還是高一點點。
再翻看一下這次世錦賽的新聞，裁判壓分，連日本隊主將內村航平賽後坦承中國隊遭遇了裁判壓分。陳一冰的吊環難度高達6.8，成套動作表現穩定、下法站住，卻只拿到了15.466分，日本隊兩人掉杠，仍舊有偏高的14.266和14.700分，偏幫都唔好做得咁明顯啦！

衰多口

話說噚日放學等車回家時見一位女士拎住幾卷宣紙，衰多口問宣紙價錢：
女士：你又係畫畫o架？
我：我學咗年幾咋~

我由佐敦上車講咗兩三句發覺話不投機，之後完全冇搭咀，然後呢位女士一路唔停口講到美孚，佢又再問我：你有冇教畫？阿姐呀，我咪講咗只係學咗年幾囉，點教呀！但佢嘅觀點係畫畫好易，學咗一年識畫一朶花就可以教人，嘩~你係天才至得啫，我自認庸才囉~佢又話由細個開始就立志做藝術家，但乜都未學過就膽粗粗舉手話識畫主席人像(佢話係回國華僑碰啱文革)，話唔鍾意教人但又話有教學生，我心諗你一切向錢看啦！講吓講吓佢話識裱畫，好開心咁話要俾咭片我，好彩佢又冇帶咭片，又問我有冇筆要俾電話我，大恅，我有都話冇啦，我已經垂低頭扮做嘢佢都唔停口，可能佢見我完全冇答咀，佢問我係咪好少應酬，我答佢完全冇應酬，哈~~~

話不投機主因完全係我學畫係為興趣，佢畫畫係為賺錢，邊傾得埋欄呀！

終於知道了

節錄：中國當代繪畫的新趨勢

http://www.chinareviewnews.com/doc/1018/5/9/7/101859717.html?coluid=154&kindid=0&docid=101859717&mdate=1009085615

儘管我們在展覽中看到了太多的風景，可是，藝術家們的重點不是風景，而是中國人特別強調的“山水”。當我們從中國古代畫家似乎是千篇一律地使用“山”、 “水”、“草”、“木”作為繪畫題材的時候，要盡可能地去理解由這些風景要素構成的“山水”的精神性含義。實際上，與西方表現客觀自然的“風景畫”不同， “山水”更多地意味著是一種超越客觀世界的精神和境界，她是一種氣質與教養的代名詞，類似羅斯金所提倡的“倫理美學”所倡導的含義。

最近家裏有點事，總定不下心來畫畫(不成理由的理由，一句話，懶。)

畫了個多月的畫，原稿是老師的舊作，我當然畫不到原畫的十分一喇！

又是臨別人的畫，畫這一張畫時因為沒心情畫山水，但又不想浪費了已經開了的墨，又想嘗試畫意筆小鳥，執起紙筆，對著稿子就畫，畫完小鳥發覺也不是太差，不如加上紫蕂花，畫完紫蕂花又發覺有點味道，也頗順眼，再不如加上葉子、再不如加上掛蕂，如此無心插柳柳蔭之下成就了一張師兄說不錯的畫，當然有自知之明，枝幹不成、掛蕂也不自然，紫蕂花的花和葉子的形態也不知對不對，還是那一句，畫得開心。

香港海濤彩墨畫會五周年紀念特刊

老師的畫會紀念特刊已經出版，自問我的作品亦沒到可以見人的階段，所以由一開始就沒打算參與到期待收到書，心情是有點矛盾的，一來沒什麼作品，二來每位參與者都要出資$400 for 一頁，總覺得太昂貴，但因為聽說會員們不是太踴躍，有少許能力的幹事們都要出兩三頁的資金去支持畫會，最後決定參與的主因還是因為希望老師他老人家開心，畢竟他年事已高，希望他高高興興的看到自己成立的畫會可以一路成長。

收到書囉，心情當然是興奮的，但亦有點失望，因為印刷後的畫作不知為何全部偏暗，就連封面那一張老師和同學們的合作畫也只是黑漆漆一堆的，這是否貪便宜的後果？

紀念特刊封面

張老師和同學們的合作畫原畫，畫展時我用60D拍的。

屬於小女子的內頁，其實這兩張畫都是去年所畫，今年我的作品總是眼高手低，力不從心。

熊貓萌萌的成長過程

煽情的日劇

連續睇咗幾套日劇，“冷面獸醫、仁醫、perfect report、臨場~非常鑑證官2”，套套都煽情，冷面獸醫還好，只係煽情，其餘嘅本來查案查得好地地都搞到男人老狗喊苦喊忽，以前啲日劇係咪咁架，唔通戲迷真係睇得韓劇多，連日劇要狂煽情至收得？

一個算係好嘅消息，醫生話龜仔冇震傷內臟，但爪子就有少許跛，要等佢自己好，唉~~人嘅錯~~
又係阿仔女友家嘅一個壞消息，小狗狗有心臟病，噢~~~點解會咁架~~~

今日畫咗三個鐘工筆畫，水漬，起“烘”乜都齊，除眼鏡就因老花散光睇唔清，戴眼鏡又因近視都係睇唔清，眼又朦手又震，腰都直埋，唉~~

麥記台版Hello Kitty手錶

因為買九日嘅嘢而認識台灣嘅佩娟，轉吓眼我已經變心N次，但佢仍然係Sammi鐵桿粉絲，慚愧，佢仍然記得我鍾意kitty，但佢除咗係 Sammi 粉絲之外，其他喜好我一概不知，更慚愧~~~~

今日又收到佩娟不遠千里寄嚟嘅 kitty 手錶，仲要幾隻添，噢~~點解麥記換購嘅產品會港台不一樣架，儲死人咩~~~

除咗講謝謝之外，還是謝謝~~謝謝佩娟~~

好唔開心，睇怕隻龜仔都係凶多吉少，雖然呢隻龜仔唔係我嘅寵物，但聽到佢因為頑皮推倒香爐，繼而被主人的媽媽“掟”落地受傷，連保護身體的外殼也出現裂紋兼沁血，唉~~~

香爐係死物，龜仔係識行識走又可以人開心嘅生物嚟架，點可以咁忍心~~~哭~~~~

成日以為當日老爸抱住嘅係coffee，原來唔係，02年映呢張相時老爸仍然可以以過九十高齡獨自來往香港同順德，05年走，同張相只係事隔三年，而轉吓眼老爸又走咗六年，連coffee 去年都去埋陪老爸，Frankie話等家裏餘下嗰三只貓都去晒陪老爸至再領養。

好久沒上工筆畫論壇，前幾日發現李曉明開了一個暑期工筆畫班，今日又發現 龔雪青工作室招生，雖然屬於短期課程，只是20天---3個月，但學習內容的確吸引，包括我最想學習的“工筆畫構圖、線的實際應用、西畫色彩與中國畫色彩的混合應用……等等”，色彩是我的弱項，不過我沒膽量一個人上河北，而且普通話不精，更重要的是沒這個$$$$$。

Honey先輩，好可愛的聲音。

兩張相比較

呢次畫展嘗試用阿仔部 Canon 60D，但都係未摸到點樣調較，因為場內每隔一段距離就有射燈，所以有好多陰影位，問題就嚟，點至可以映到人夠光，而背面嘅畫又夠光？好多都係就得人嚟又到啲畫爆晒光，相反的就得畫嚟又輪到人又太暗，而聽細仔嘅說話係，要用外置閃燈，要用柔光罩，噢~~~算把喇！

以下兩張相的比較：

呢張係我用Canon 60D，荒死佢唔夠光，光圈攞到最盡，後期亦有用執相軟件執過光暗，當然呢種軟件冇 photoshop咁萬能，但咁又變成雲的部份唔夠立體，整張相就全無立體感。

呢張係細仔用FUJI- S100FS，佢通常光圈唔會攞到盡，完全冇執過之下，雖然畫面稍暗，但又多咗立體感。

我始終認為唔係靠自己技術，而靠 photoshop至靚嘅相，係完全冇滿足感。

篆刻

針對噚日 Gloria 對印章的疑問，現粗略的講一下，印章上字體大都用篆書，篆刻是刻印印章的一種， 所以篆刻泛指一切雕琢技法，另外又按照印文的凹凸，分為朱文印和白文印。
用同樣一個“燕”字示範，字體在形狀上雖然有少許不同，但因為以美觀為原則去改變，並不會影響字的意思。

朱文印


白文印

謝謝各位支持~

謝謝各位支持這個畫展，睇完今次畫展就自覺我嘅畫係拘謹有餘，寫意不足，咁都拎嚟展覽實在自慚形穢。

今日會長叫我畫工筆人物，我都未學過，邊識得畫呀，而且膚色應該用乜嘢色都未知，老實講，睇見佢哋啲工筆就…………唉…………比著以前工筆畫老師一定會話：“線條唔得，再鈎過另一張。”又或者話：“未夠色，繼續做。”當時我哋會問：“點至夠色呀，老師？”然後，如果時間上實在太趕的話，老師會即席用較深嘅顏色示範，但我哋就不可能似佢咁用咁深色，因為顏色會推唔開，推唔開就做唔到漸變嘅效果，講下講下又勾起畫工筆嘅興趣，但鈎線方面已經不復當年勇喇！

懷舊香港情─電視