牡丹

 2014海濤第八屆會員作品畫展上的其中一張作品，原本諗住今屆會出書法，但上兩個月放學後和師兄師姐們午飯時，師兄叫我趁可以畫工筆就要多畫，再老啲就眼朦手震，力不從心，還好最近一年都係寫字的多，寫字有助工筆鈎線的穩定，又一直有留意工筆畫的畫稿，所以一激起畫工筆的念頭就可以立即啟動，稿、紙、顏色、執筆步驟，一刻也不能慢，因為距離畫展只餘個半月，還要預留最少十天裝裱，實際畫畫不能超過一個月，還好有 Carmen 全程提點，又有“文雅堂”李先生指導，才有這張工筆牡丹面世，裝裱後只餘大半天時間做點花蕊和蓋章， Carmen話左邊欠了點文字，例如寫上年份和姓名等，而且畫作尚有好多可以修改，但一來時間緊迫，二來怕如果失敗就連參展品也無望，就這樣也不是太失禮吧！

契媽又入咗院，又係膽管發炎，因為契哥怕契媽辛苦，唔贊成詳細檢查，於是每次都係打針食藥止住咳先，冇燒就出院，發燒又入返去，如是者由去年十月到現在，佢出出入入都己四次，佢每次入院，契哥就 down 晒話己經好小心俾嘢契媽食，我話，條喉塞咗，你唔通佢就始終會返發，而且佢年紀太大，亦唔打算做啲乜，醫生都話呢個情形會越來越壞，因為根本係身體機能退化。

我黑心的感覺，醫學發達，人越嚟越長壽，要幾多人力、物力、財力嚟支援你餘下的生命！

1403台灣行題外話

睇完噚日新聞，啲人反對興建垃圾焚化爐，令我諗起今次的台灣行，當我和 carmen 去到台北車站準備買車票往機場回港時，有一個人走埋嚟吊泥鯭，二百一位，仲話有兩個香港女孩同車的，和女孩溝通過後一齊去機場，司機叔叔沿途好似做導遊咁，介紹景點之餘還論下政咁啦，而我最感興趣的係沿途經過一個垃圾山和垃圾焚化爐，佢唔講都唔知大山頭一模樣的係由垃圾堆積成的，整個山頭種滿植物，山上係一個高爾夫球場，而垃圾焚化爐本身建築物好大，外貌比天水圍西鐵站還大，約有四五層，沒煙囪，周圍空氣清新，佢唔講亦係唔知原來係垃圾焚化爐。
既然香港的議員已經參考過台灣和日本的垃圾焚化爐，照版煮碗不就得了，究竟難在那裏？

阿仔想我帶路去台北，但只得三日假又想去偏遠啲，我都好幾年冇去台北，而家再去又要刨一輪旅遊書，徧徧佢哋定的出發日期係星期一，又原來台灣有好多景點都係周一休息，包括“食養山房”，噢~~度完一輪嘅行程又要再度過，又因時間太趕急，所以最後都選擇包車來回機場以節省時間，咁就可以行得從容啲，機票加酒店連稅只係$22xx.00，兌換價3.6x，這個差別不大。

第一日，十一點十分落地 連埋過關、換錢，約十二點就去到東龍，放下行李隨即去台北動物園，約半個鐘到動物園站，整個動物園依山而建，除了熊貓和企鵝，其餘動物都采開放式的，並不會困在籠子裏，動物的活動空間很多，遊人的休閒空間也很大，全程微斜向山上行，於是行完最高點的企鵝館後已經兩粒鐘，無力往回走了，選擇了坐 $5 遊客列車回頭，四點幾，回復興站鼎泰豐吃飯剛好，不用繁忙時段等位等到傻，飯後回西門町吃冰冰，再到東龍前面的生活百貨走一圈就回酒店了。

團團，佢好似知道有人映相，食食下會定一下俾你映，有點不滿是員工不斷在旁催促，遊人又唔係多，十個都冇，駛乜催呀！

因 yahoo blog 將會停止，於是將以前的旅行照片轉到 blogger，再睇返 blogger早期的舊貼，lego 呀、畫畫呀、熊貓呀、廖太們呀，每一篇都係開開心心的，唔似得近兩年咁，差不多隔一篇就出現負面情緒的。

契媽入住安老院兩月多，契哥亦於上個月回美，今次佢會留到年尾至回港，我的心情？因為一星期去探契媽兩至三次，所以比以前是輕鬆得多，但仍然抱怨沒時間畫畫，只因人懶了，最近翻起畫工筆畫的心，試畫了三幾張稿，還未有一張滿意的，但不要緊，只要還有這個心就好。

最近寫的，和以前差遠了。

契媽入住老人院兩個月，事緣係印傭不續約，契哥無計可施下也唯有送契媽入院，呢間老人院係契哥朋友介紹，位於屯門嶺南大學附近的富泰邨，富泰邨商場二樓至四樓都屬老人院，自成一角，環境清靜，有獨立梗房，獨立冷氣，當然，月費也比較貴，連冷氣費好似要九千幾，契媽住咗兩個月就肥咗又精神咗，明顯趁佢仲有意識時住院係好的，起碼佢可以自己慢慢適應環境，其實有好多院友都係行得走得， 日間周圍去，夜晚至回院睡覺，更有老人在院舍炒股，叻仔，九千幾當組酒店，抵啦！

觀音白描&隸書心經

觀音白描係前兩年畫，心經就係年初時寫嚟靜心的，嗰陣不斷寫不斷寫，完成之後忽發奇想，不如將觀音圖合併，就當是今年畫展的作品好了，其實由去年畫展到現在，一張畫都冇成功出世，契哥佢前幾日回美，佢叫我得閒去佢家開下窗，又或者開行冷氣畫下畫，講得真易，畫意筆要意到，要靜，畫工筆要有耐性，又係靜，日日冇幾個鐘坐定，何來靜心？

2013香港海濤彩墨畫會第七屆會作品展花絮

多年前知道有 blog 這種東東之後就覺得超讚，終於有一個自己書寫心情的地方，我亦盡量把自己的負面情緒隱藏起來，一些應該被遺忘的不快就不要出現在這裏，但在最近的半年，我這種不懂得揣摩人心兼單純(蠢)的家庭主婦也忍受不了，頻頻在這裏發洩。

印傭回鄉三星期，這段時間契媽要暫時入住老人院，但是便宜莫貪真沒錯，契哥選擇了一間價錢便宜的老人院，當然全部都很差，這幾星期契哥每日到老人院看望一下，有時會帶契媽回家半日，如果契媽沒那麼多要求而老人院又好的話，這樣實在是不錯的安排，最錯的就是選了一間質素差的老人院。
契哥因為 whatsapp 不能和印傭聯絡上，怕她一去不回，前幾日他帶我再去另一間老人院,，這一間風涼水冷，獨立房間，獨立冷氣，每4-5個房間就有一個空間供老人看電視，或和親友們聊天，環境清靜，契哥跟我講，即使印傭回來，他也會送契媽到這裏入住，工人日間就到老人院照顧，參觀完老人院後一起回家時，他也沒改變這個決定，我亦不敢給太多意見，好了，問題又來了，事過兩日他給我電話，最新決定是印傭如果回來，一切不變，印傭不回，契媽住院兼請一個工人到老人院照顧契媽，我問，印傭回來也一樣可以到老人院照顧，他說不一樣，既然不一樣，又為何帶我參觀老人院，這樣給我的感覺是他想測試一下我的反應，知否這樣對我好殘忍的~~~

我不能下決定，因為不是我媽，以後有問題就連親戚也沒得做。

原來又兩個月，時間過得真快，呢排嘗試用寫字將心定下來，寫咗好幾遍心經，終於有一篇冇漏字又過得自己眼的完成，並送咗俾 Carmen 做生日禮物。






自從同契哥講叫佢自己安排工人照顧契媽之後，心好像忽然安定下來，冇之前咁焦躁不安，反而契哥每每提到佢同佢大佬啲激氣嘢就忍唔住哭，俾我感覺佢開始有抑鬱傾向，可能佢困得自己太死，乘受過大壓力，佢自己又放唔開俾老母親入院，又要顧及在美的老婆，佢身邊的女人都將佢吃得死死的，我曾經幫過佢，但我退一步佢又更進一步，我精神上亦不能無止境的幫、無止境的退，雖然有時都覺自己而家決絕，但前幾日又聽佢講佢會七月前回美一次，而且為期不短，咁即係點？只有印傭一個唔掂架喎~~~

赤柱半日遊

因為可兒回港，Carmen 問我會否得閒一起晚飯，地點會在港島東，冇所謂，反正好久冇見可兒，也好久冇去過港島東囉~

去年同 Carmen去丹霞山時認識可兒，可兒同 Carmen 幾十年朋友，佢老公約十年前在詔關工作，所以佢都兩邊走，我哋喺詔關佢都打點好多。

雖然話係晚飯，但想早點周圍逛，又唔想逛商場，於是同 Carmen 去咗赤柱，又原來以前 Carmen 成日入赤柱都係工作，未試過遊玩，哈~~~我順理成章做咗導遊喇，又因為想早點出筲箕灣，所以只係行咗美利樓和古井就算，連赤柱市集都冇行，在巴士站旁的 pacific coffee 坐一陣，食少少嘢就離開。

熟口熟面不用介紹喇！

原來兩個月冇update，這裏已經變成我抒發情緒之地，呢一篇亦不例外，太多太多的不快無從說起。

上兩星期我向契哥表示直至七月都沒空，如果他又回美的話，他要安排工人照顧契媽，而且我漸漸覺得契媽已經被他寵壞，前幾個月我已跟老公講，佢再咁樣寵下去，接手照顧的會好辛苦，噚日終於見識到契媽的“long lai”，而且我覺得契媽已經出現抑鬱。

噚日契哥表示不會送契媽入老人院，要有人手至可以唔住院嘅啫，佢啲兒孫又懶理大安指意，我也要有我的空間，我也要有我的娛樂，我幾個月定不下心來畫畫，連我老公都以為我已放棄畫畫，不要把我當做萬能後備隨傳隨到至得㗎~~~可能連我都有抑鬱都未定~~~

契哥臨時又要返美，呢個月又要註守契媽家，不過呢一次只需契媽沖涼、印傭放假和印傭要買餸，我就要去當值，所以都可以講不定時當值。

契媽而家係穩定地、緩慢地退化， 所以今次契哥回來後，大家有傾過契媽狀況，因為只得契哥一人，壓力太大，契哥自己啲病痛都慢慢呈現，佢亦好無奈，契媽而家好多時夜晚唔訓覺，晚晚叫人，即使契哥在港，有時半夜契媽都會打電話找兒子，搞到契哥自己都要午睡補眠，但佢仍然認為自己媽媽無病無痛，只不過不能行走就要入院，但無覺好訓呢種壓力點撐呀！我仍然建議為旁邊人著想，契媽入老人院係遲早嘅事，我是否好無情？

看完“一代”後

多月前無意中睇到“一代宗師”預告片，聲音好熟，咦~~“天下糧倉”的主角？“王慶祥”雖然樣子同“天下糧倉”時差好遠，但聲調很好認，唔係王家衛fans，入戲院睇佢嘅戲就只有“阿飛正傳”，喺電視睇“花樣年華”睇到嘔血，唔係睇唔明，而係太藝術會好悶咁啫~

跟甄子丹嘅“葉問”好唔同 ，“一代”講嘅唔係葉問一個人，前半部係提吓詠春之外，下半部全部都係章子怡嘅八卦掌，而張震只有兩三場戲，聽講原本有佢同梁朝偉對打的，但刪了，臨結尾張震一場戲還有點搞笑成份。

如果想睇詠春嘅會失望，但如果為了睇華美的畫面，咁就非看不可，金樓的裝飾，金樓裏所有人物的造形，幾場對打場面，每個鏡頭都可以是一幅畫。

呢套戲裏面梁朝偉眼神的驚喜場面，臨完前約廿分鐘，因章子怡已經惋距用六十四手同佢對打，於是佢走訪章子怡已隱居香港嘅師伯，希望可以一窺六十四手嘅架式，場面係師伯同梁朝偉點煙，而梁朝偉側起頭接受時的眼神，當然最後師伯亦係拒絕，六十四手最後是否後繼無人？因為章子怡飾演的“宮二”講明不婚、不授徒，還有一個不，忘了。

真人版“浪客劍心”

N年前人氣漫畫改編，真人版“浪客劍心”，主要演員：
佐藤健→緋村劍心
武井咲→神谷熏
吉川晃司→鵜堂刃衛
江口洋介→齊藤一
香川照之→武田觀柳

雖然人物設定已經跟得好足，但漫畫版的劍心有 BABY FACE，佐藤健冇，戲中佐藤健做殺手時不夠殺氣，做浪人時又不夠傻氣，漫畫版的齊藤一眼神有點邪氣，江口洋介的眼神太正氣。
如果唔係不太討厭佐藤健，睇怕呢套真人版都好難捱，聽講佐藤健在拍攝《龍馬傳》有練習劍術，但仍睇得出尾二一場打鬥好吃力，漫畫真人版從來都係吃力不討好，呢套也不例外~

最主要的，劍心賴以成名的飛天御劍流的九頭龍閃，戲中完全冇展現囉~

未完成畫作

三個月前畫嘅松樹不捨得丟，再拎出嚟鬥一下，畫松樹時也只是隨手畫幾下，左邊硬加上本身係古畫嘅部份構圖，覺得格格不入，但乜都唔理，死就死啦，畫下畫下就變成現今模樣，構圖方面尚未完善，起碼松樹後面的遠方要加少少淡淡背景，呢個喺我嚟講亦係最難處理嘅部份，但本死嘅心態，最後說不定會成功，起碼有一張由頭到尾臨古畫的作品，到而家仲“藕”喺度未完成，因為畫得太靚(有點自大)反而步步為營唔敢再落筆。

鄭容和、朴信惠的“你為我著迷”，好鍾意呢首歌，雖然只得幾句。

經此一役，原來最明白契哥性格的還是佢老婆，契嫂唔回港係明智嘅選擇，回來的話，只怕會三日一小吵，有傷和氣。

欲哭無淚~~~~~~

有時諗，契媽係我契媽，但咁多年以嚟每逢過時過節，姐妹們都一起同契媽慶祝，噚日阿妹入嚟探契媽時討論一個問題，契嫂唔肯回港但又怨契哥只掛老母親，契哥要港美兩邊走是否對的？

我說，如果契嫂唔係契嫂，而係自己姐妹的話，又會否體諒佢唔回港嘅決定？

我會，因為年紀約四十也不小了，如果請辭回港，過兩年再返美年紀就大，好難搵工，但會俾時間佢唔駛佢兩邊走。

阿妹唔會，佢認為女兒也大了，大學了吧，如果唔想兩公婆分開太久，都係要一起回港。

講完一輪，各持己見，冇結論。

還是覺得契媽應該住老人院，頭先佢“埃”喺梳化，工人扶佢起身坐上輪椅去食飯都差啲唔夠力，食完飯淨係抺面抺咀都抺咗四五次，隔一陣又話未抺要再抺，咁又唔係咁又唔啱，搞到印傭都喊晒話唔知點做，最慘係佢成日呻吟話自己死唔去，同佢解釋亦冇用，可能轉吓頭佢自己都忘了，對旁邊啲人係一種折磨，可以忍心當聽唔到？carmen 話我哋應該睇心理專家。