因 yahoo blog 將會停止，於是將以前的旅行照片轉到 blogger，再睇返 blogger早期的舊貼，lego 呀、畫畫呀、熊貓呀、廖太們呀，每一篇都係開開心心的，唔似得近兩年咁，差不多隔一篇就出現負面情緒的。

契媽入住安老院兩月多，契哥亦於上個月回美，今次佢會留到年尾至回港，我的心情？因為一星期去探契媽兩至三次，所以比以前是輕鬆得多，但仍然抱怨沒時間畫畫，只因人懶了，最近翻起畫工筆畫的心，試畫了三幾張稿，還未有一張滿意的，但不要緊，只要還有這個心就好。

最近寫的，和以前差遠了。

契媽入住老人院兩個月，事緣係印傭不續約，契哥無計可施下也唯有送契媽入院，呢間老人院係契哥朋友介紹，位於屯門嶺南大學附近的富泰邨，富泰邨商場二樓至四樓都屬老人院，自成一角，環境清靜，有獨立梗房，獨立冷氣，當然，月費也比較貴，連冷氣費好似要九千幾，契媽住咗兩個月就肥咗又精神咗，明顯趁佢仲有意識時住院係好的，起碼佢可以自己慢慢適應環境，其實有好多院友都係行得走得， 日間周圍去，夜晚至回院睡覺，更有老人在院舍炒股，叻仔，九千幾當組酒店，抵啦！

觀音白描&隸書心經

觀音白描係前兩年畫，心經就係年初時寫嚟靜心的，嗰陣不斷寫不斷寫，完成之後忽發奇想，不如將觀音圖合併，就當是今年畫展的作品好了，其實由去年畫展到現在，一張畫都冇成功出世，契哥佢前幾日回美，佢叫我得閒去佢家開下窗，又或者開行冷氣畫下畫，講得真易，畫意筆要意到，要靜，畫工筆要有耐性，又係靜，日日冇幾個鐘坐定，何來靜心？

2013香港海濤彩墨畫會第七屆會作品展花絮

多年前知道有 blog 這種東東之後就覺得超讚，終於有一個自己書寫心情的地方，我亦盡量把自己的負面情緒隱藏起來，一些應該被遺忘的不快就不要出現在這裏，但在最近的半年，我這種不懂得揣摩人心兼單純(蠢)的家庭主婦也忍受不了，頻頻在這裏發洩。

印傭回鄉三星期，這段時間契媽要暫時入住老人院，但是便宜莫貪真沒錯，契哥選擇了一間價錢便宜的老人院，當然全部都很差，這幾星期契哥每日到老人院看望一下，有時會帶契媽回家半日，如果契媽沒那麼多要求而老人院又好的話，這樣實在是不錯的安排，最錯的就是選了一間質素差的老人院。
契哥因為 whatsapp 不能和印傭聯絡上，怕她一去不回，前幾日他帶我再去另一間老人院,，這一間風涼水冷，獨立房間，獨立冷氣，每4-5個房間就有一個空間供老人看電視，或和親友們聊天，環境清靜，契哥跟我講，即使印傭回來，他也會送契媽到這裏入住，工人日間就到老人院照顧，參觀完老人院後一起回家時，他也沒改變這個決定，我亦不敢給太多意見，好了，問題又來了，事過兩日他給我電話，最新決定是印傭如果回來，一切不變，印傭不回，契媽住院兼請一個工人到老人院照顧契媽，我問，印傭回來也一樣可以到老人院照顧，他說不一樣，既然不一樣，又為何帶我參觀老人院，這樣給我的感覺是他想測試一下我的反應，知否這樣對我好殘忍的~~~

我不能下決定，因為不是我媽，以後有問題就連親戚也沒得做。

原來又兩個月，時間過得真快，呢排嘗試用寫字將心定下來，寫咗好幾遍心經，終於有一篇冇漏字又過得自己眼的完成，並送咗俾 Carmen 做生日禮物。






自從同契哥講叫佢自己安排工人照顧契媽之後，心好像忽然安定下來，冇之前咁焦躁不安，反而契哥每每提到佢同佢大佬啲激氣嘢就忍唔住哭，俾我感覺佢開始有抑鬱傾向，可能佢困得自己太死，乘受過大壓力，佢自己又放唔開俾老母親入院，又要顧及在美的老婆，佢身邊的女人都將佢吃得死死的，我曾經幫過佢，但我退一步佢又更進一步，我精神上亦不能無止境的幫、無止境的退，雖然有時都覺自己而家決絕，但前幾日又聽佢講佢會七月前回美一次，而且為期不短，咁即係點？只有印傭一個唔掂架喎~~~

赤柱半日遊

因為可兒回港，Carmen 問我會否得閒一起晚飯，地點會在港島東，冇所謂，反正好久冇見可兒，也好久冇去過港島東囉~

去年同 Carmen去丹霞山時認識可兒，可兒同 Carmen 幾十年朋友，佢老公約十年前在詔關工作，所以佢都兩邊走，我哋喺詔關佢都打點好多。

雖然話係晚飯，但想早點周圍逛，又唔想逛商場，於是同 Carmen 去咗赤柱，又原來以前 Carmen 成日入赤柱都係工作，未試過遊玩，哈~~~我順理成章做咗導遊喇，又因為想早點出筲箕灣，所以只係行咗美利樓和古井就算，連赤柱市集都冇行，在巴士站旁的 pacific coffee 坐一陣，食少少嘢就離開。

熟口熟面不用介紹喇！

原來兩個月冇update，這裏已經變成我抒發情緒之地，呢一篇亦不例外，太多太多的不快無從說起。

上兩星期我向契哥表示直至七月都沒空，如果他又回美的話，他要安排工人照顧契媽，而且我漸漸覺得契媽已經被他寵壞，前幾個月我已跟老公講，佢再咁樣寵下去，接手照顧的會好辛苦，噚日終於見識到契媽的“long lai”，而且我覺得契媽已經出現抑鬱。

噚日契哥表示不會送契媽入老人院，要有人手至可以唔住院嘅啫，佢啲兒孫又懶理大安指意，我也要有我的空間，我也要有我的娛樂，我幾個月定不下心來畫畫，連我老公都以為我已放棄畫畫，不要把我當做萬能後備隨傳隨到至得㗎~~~可能連我都有抑鬱都未定~~~

契哥臨時又要返美，呢個月又要註守契媽家，不過呢一次只需契媽沖涼、印傭放假和印傭要買餸，我就要去當值，所以都可以講不定時當值。

契媽而家係穩定地、緩慢地退化， 所以今次契哥回來後，大家有傾過契媽狀況，因為只得契哥一人，壓力太大，契哥自己啲病痛都慢慢呈現，佢亦好無奈，契媽而家好多時夜晚唔訓覺，晚晚叫人，即使契哥在港，有時半夜契媽都會打電話找兒子，搞到契哥自己都要午睡補眠，但佢仍然認為自己媽媽無病無痛，只不過不能行走就要入院，但無覺好訓呢種壓力點撐呀！我仍然建議為旁邊人著想，契媽入老人院係遲早嘅事，我是否好無情？

看完“一代”後

多月前無意中睇到“一代宗師”預告片，聲音好熟，咦~~“天下糧倉”的主角？“王慶祥”雖然樣子同“天下糧倉”時差好遠，但聲調很好認，唔係王家衛fans，入戲院睇佢嘅戲就只有“阿飛正傳”，喺電視睇“花樣年華”睇到嘔血，唔係睇唔明，而係太藝術會好悶咁啫~

跟甄子丹嘅“葉問”好唔同 ，“一代”講嘅唔係葉問一個人，前半部係提吓詠春之外，下半部全部都係章子怡嘅八卦掌，而張震只有兩三場戲，聽講原本有佢同梁朝偉對打的，但刪了，臨結尾張震一場戲還有點搞笑成份。

如果想睇詠春嘅會失望，但如果為了睇華美的畫面，咁就非看不可，金樓的裝飾，金樓裏所有人物的造形，幾場對打場面，每個鏡頭都可以是一幅畫。

呢套戲裏面梁朝偉眼神的驚喜場面，臨完前約廿分鐘，因章子怡已經惋距用六十四手同佢對打，於是佢走訪章子怡已隱居香港嘅師伯，希望可以一窺六十四手嘅架式，場面係師伯同梁朝偉點煙，而梁朝偉側起頭接受時的眼神，當然最後師伯亦係拒絕，六十四手最後是否後繼無人？因為章子怡飾演的“宮二”講明不婚、不授徒，還有一個不，忘了。

真人版“浪客劍心”

N年前人氣漫畫改編，真人版“浪客劍心”，主要演員：
佐藤健→緋村劍心
武井咲→神谷熏
吉川晃司→鵜堂刃衛
江口洋介→齊藤一
香川照之→武田觀柳

雖然人物設定已經跟得好足，但漫畫版的劍心有 BABY FACE，佐藤健冇，戲中佐藤健做殺手時不夠殺氣，做浪人時又不夠傻氣，漫畫版的齊藤一眼神有點邪氣，江口洋介的眼神太正氣。
如果唔係不太討厭佐藤健，睇怕呢套真人版都好難捱，聽講佐藤健在拍攝《龍馬傳》有練習劍術，但仍睇得出尾二一場打鬥好吃力，漫畫真人版從來都係吃力不討好，呢套也不例外~

最主要的，劍心賴以成名的飛天御劍流的九頭龍閃，戲中完全冇展現囉~

未完成畫作

三個月前畫嘅松樹不捨得丟，再拎出嚟鬥一下，畫松樹時也只是隨手畫幾下，左邊硬加上本身係古畫嘅部份構圖，覺得格格不入，但乜都唔理，死就死啦，畫下畫下就變成現今模樣，構圖方面尚未完善，起碼松樹後面的遠方要加少少淡淡背景，呢個喺我嚟講亦係最難處理嘅部份，但本死嘅心態，最後說不定會成功，起碼有一張由頭到尾臨古畫的作品，到而家仲“藕”喺度未完成，因為畫得太靚(有點自大)反而步步為營唔敢再落筆。

鄭容和、朴信惠的“你為我著迷”，好鍾意呢首歌，雖然只得幾句。

經此一役，原來最明白契哥性格的還是佢老婆，契嫂唔回港係明智嘅選擇，回來的話，只怕會三日一小吵，有傷和氣。

欲哭無淚~~~~~~

有時諗，契媽係我契媽，但咁多年以嚟每逢過時過節，姐妹們都一起同契媽慶祝，噚日阿妹入嚟探契媽時討論一個問題，契嫂唔肯回港但又怨契哥只掛老母親，契哥要港美兩邊走是否對的？

我說，如果契嫂唔係契嫂，而係自己姐妹的話，又會否體諒佢唔回港嘅決定？

我會，因為年紀約四十也不小了，如果請辭回港，過兩年再返美年紀就大，好難搵工，但會俾時間佢唔駛佢兩邊走。

阿妹唔會，佢認為女兒也大了，大學了吧，如果唔想兩公婆分開太久，都係要一起回港。

講完一輪，各持己見，冇結論。

還是覺得契媽應該住老人院，頭先佢“埃”喺梳化，工人扶佢起身坐上輪椅去食飯都差啲唔夠力，食完飯淨係抺面抺咀都抺咗四五次，隔一陣又話未抺要再抺，咁又唔係咁又唔啱，搞到印傭都喊晒話唔知點做，最慘係佢成日呻吟話自己死唔去，同佢解釋亦冇用，可能轉吓頭佢自己都忘了，對旁邊啲人係一種折磨，可以忍心當聽唔到？carmen 話我哋應該睇心理專家。

節錄：唐寅生平

http://www.gongbi.net/thread-73421-1-1.html

明 唐寅(1470年一1523年)為世稱明代四大畫家之一，與沈周、文徵明  及仇英齊名；而他浪漫的一生，由當時的俗文學作者加枝添葉，把他化為傳奇 人物，家傳户曉，掩過了他在詩、書、畫各方面應得的令名。實際上，他是一位绝頂聰明的文人藝術家，早年縱酒不務正業，接受了好友祝允明的規勸，閉戶讀書， 在弘治十一年(1498年)鄉試第一，所以有“南京解元”一印。這是他少年得意的黄金時刻，不料他同江陰富人徐經同舟赴京應試，徐氏賄賂會試總裁的家僮得 試題，事露，唐寅被牵連，下詔獄，謫為吏，他耻不就，就無法再走功名之路；只好放浪形迹，遊山逛海，然後“窮研造化，尋究律曆，求揚元、馬虚、邵氏聲音之 理，而贊訂之；旁及風鳥壬遁太乙，出入天人間”  (見《吴縣誌·唐寅列傳》)。這就是說，他被迫放棄“正道”，而走人“左道旁門”。但這是大起大落後的 反應。不久他就回到文學、美術的園地，儘量發揮他的天才與功力。

http://zh.wikipedia.org/zh-tw/%E5%94%90%E5%AF%85

吳中四才子唐寅 | 祝允明 | 文徵明 | 徐禎卿
唐寅從此絕意仕途，後漫遊華中、江南諸山。正德四年（1509年），唐寅在蘇州城北的宋人章莊簡廢園址上築室桃花塢，開始出爐大量優質作品，其人物畫多描寫古今仕女生活和歷史故事。唐寅的畫作中有一印刻「江南第一風流才子」，雖然歷代對此作品之真偽也頗多爭議，但此名遂為後世流傳，稱之為「風流才子」、「風流畫家」等。
《明史》
【列傳第一百七十四文苑二】
　　唐寅，字伯虎，一字子畏。性穎利，與裏狂生張靈縱酒，不事諸生業。祝允明規之，乃閉戶浹歲。舉弘治十一年鄉試第一，座主樑儲奇其文，還朝示學士程敏政，敏政亦奇之。未幾，敏政總裁會試，江陰富人徐經賄其家僮，得試題。事露，言者劾敏政，語連寅，下詔獄，謫為吏。寅恥不就，歸家益放浪。甯王宸濠厚幣聘之，寅察其有異志，佯狂使酒，露其醜穢。宸濠不能堪，放還。築室桃花塢，與客飲其中，年五十四而卒。
　　寅詩文，初尚才情，晚年頹然自放，謂後人知我不在此，論者傷之。吳中自枝山輩以放誕不羈為世所指目，而文才輕豔，傾動流輩，傳說者增益而附麗之，往往出名教外。
明 唐寅《王蜀宮妓圖》軸



















明 唐寅《沛台實景圖》頁

噚晚 update 咗個電話，搞咗一大餐終於搞定，雖然資料冇事，但所有設定要重頭搵過，頭先由sim卡複製埋啲電話號碼，因為之前有好多號碼重複我冇理，而家update完就頭大，所以最討厭就係 update。

回應 annie 問我呢排睇咗乜嘢劇，10/11開始，睇完的有“回家的路(每集三十幾分鐘，共120集)、四大名捕、狄仁杰之通天帝國”，重看“黄金新娘(部份)、49天(部份)，寵物情人只看了開頭和結尾的幾分鐘(垃圾)，現正播出中的“大風水、馬醫、不結婚”，總之日日一去到契媽家就係對住電腦看劇，就只有呢兩日有返小小心情畫吓畫，並且完成一張畫咗成個月的小作品，開心ing~~~~

瘋狂歷史

回應廖太亞四，補習社我集集都有追看，到現時為止只有岳飛嘅“盡忠報國”比較意外，武則天、秦始皇等，唔係讀書讀過就係劇集做到爛，而唐伯虎坎坷嘅事跡於好久以前喺報紙副刊睇過，最後佢係幾潦倒，靠賣畫為生，可能係咁至會有好多作品留存後世。 

可能我先入為主，以為拍得出嚟就一定有好多深入D嘅料，冇留意佢嘅主題“瘋狂歷史”，所以有DD失望。