剛剛和契媽飲茶，與契哥閒聊講起 Gloria 於貴州所見，講到貴州崎嶇的山路、缺水令人們清潔衛生成問題、知道有外人到訪，孩子們把家裏最好的衣服都穿上，等等…等等時，眼淚尚忍得住，但當講到貴州的孩子們連吃飯也成問題，一日的食糧就只得學校供應的午飯，學校的午飯成為上學主因，我即刻忍不了，雖未致眼淚直流，但已經哽咽不能語。

終於睇完“人生真美麗”，最初吸引我嘅係佢 sell 同性戀，睇咗兩集就知原來完全唔係嗰回事，故事就如韓版真情，一家十口阿婆阿媽咁每人一條支線，雖然全部演員都係好戲之人，但六十三集仍然睇到想死，一集一個鐘幾條支線，邊有咁多同性題材可以講丫，聽說合家歡時間播出，有家長抗拒同性題材，最終出街嗰陣佢兩個只係摟摟抱抱了事，連 kiss 也欠奉，畫完牡丹之後連追幾日，雖然兩個都唔係靚仔型，但都係中招，可能同同性戀呢個題材有關，喺我嘅歷史裏迷戀呢回事相信唔超過一個月。

給 Julie 的生日禮物

分染篇：上個月去澳門睇畫展回來後挑起畫工筆條癮，又因為 Julie 生日近，於是的起心肝摷稿練習，久疏練習工筆畫，齋練鈎線就畫咗好幾張，做色又畫咗兩張，第一張想畫白色花朵，於是花瓣部份用翠綠分染，唔可以話好成功，但一啲難度都冇，只染咗三次就搞定，到葉子部份，呢個喺我嚟講是難的，因為葉子多而繁雜，要做到層次光暗，還要分染時不能起漬，顏色要到邊，最重要係我從來都調教唔到最後要平塗的綠色，雖然時間尚且充裕，抱住死就死嘅心態，點知就真係死咗，因為時間緊迫，又因為剛起的稿不能立即做色，於是二話不說漏夜再起一張新稿留待第二天做色，今次打算用墨色做葉子，但花朵部份用乜嘢色呢，因為如果做淺色的花就要用淺墨起稿，我打算做硃紅色的花，於是就用中墨起稿，分染硃紅色的花並唔係用紅色。而係用花青色(藍色)，用花青色分染又比翠綠難，色太濃的話好難推得開，要推得開就要用極淡的花青色，慢慢一層一層的染，齋分染花朵部份用咗三日，因為要有自然光(陽光)，每朝十點多到下午三點多，花朵部份分染完後其實應該平塗硃紅色，咁紅色的花朵就會出現，但平塗紅色亦不易，做得唔好紅色會變灰，唔夠紅潤豔麗，所以就先向墨色葉子埋手，用墨分染嘅難處係墨汁有膠質，太濃的話推唔開，又係要一層一層慢慢的染，因為葉子多，所以分染葉子做咗好幾天，葉子部份比我想像中做得好，全部完工後再看染成藍色的花朵也不差，也好清雅，雖然花朵的鈎線比較深色，但尚可接受，最終定案係藍色。


裱畫篇：畫又唔係自己裱，點解要特意講解裱畫？皆因家裏有幾張先人留下的舊畫，好喜歡嗰種裝裱方式，又易收藏，又因為懶帶舊畫做版，去“文雅堂”講明要求，但原來係冇用，裱出嚟又係兩回事，舊的硬淨清雅，新的較薄弱，而且無端係表面多貼一小張顏色紙，裏面一面係畫一面係白紙，因為字體唔靚冇預計提字的我即刻呆晒，老闆話唔提字亦可，但唔提字又太空白，又要上網摷牡丹詩句又要練字，最終變成圖中模樣。

PS：畫畫係我興趣，廖太們唔駛唔好意思，反而難為你們收到拙作當禮物。

新舊畫裝裱的比較

亞四外婆走了，退一步想佢冇乜病痛之下走亦係一種福氣。

回看我契媽一直冇好亦冇壞咁躺在床，已經不可能期望佢自己有力落地，契哥壓力亦好大，一邊不放心契媽一個人在港，一邊老婆在美，又因為前幾年知道契媽肺有陰影後，退晒所有生意，一心回港照顧母親，簿仔裏的 $$$$就用一蚊少一蚊，呢個又係壓力。

我呢，既然契哥唔想契媽住老人院，我能幫的就幫，其餘的真係愛莫能助。

先要謝謝廖太們，呢件事令我感到原來人可以改變咁大。

另一件事，再謝謝同學仔 carmen 和阿妹，提醒咗我完全冇意識過嘅後果，雖然現階段雙方完全信賴，但唔代表冇意外，如果出意外我係承擔唔起的，喺我思維模式裏只想幫人，我就係冇諗過呢個意外。

幾十年都喺溫室裏，講好聽啲呢兩件事更令我知道自己太單(蠢)，難聽啲其實係低 B~~~~

再失敗

上次山水畫失敗後再畫過另一張工筆畫，仍然以失敗告終，只因為以前畫得到嘅工筆，又完全冇諗過太耐冇畫工筆，太自負通常都會衰收尾，上次山水畫失敗在遠山太重手，今次工筆失敗原因仍然係太重手，再繼續另一張，但唔知趕得及否，唔通又要諗過另一個方案？

鬥咗兩日生日禮物，都係失敗，仲有個多星期咋，趕唔到的話又要諗過另一個方案囉~

海濤畫會第六屆會員作品展

海濤畫會第六屆會員作品展
地點：香港文化中心行政大樓四樓展覽館
日期：2012-07-27至29
時間：27日 ─   3 pm 至 7 pm
            28日 ─ 10 am 至 7 pm
            29日 ─ 10 am 至 6 pm   

歡迎光臨指導

會員作品展場刊

我的展品─臨朗世寧松樹

膽固醇驗血報告

噚日睇膽固醇驗血報告，上次嘅驗血報告已經比未食血壓藥之前差，事隔兩年，今次就諗又唔知退化成點，點知出乎意料之外的好，醫生問我食嘢係咪好清淡，我話一向以嚟都唔鍾意太肥膩食物，但心諗，我仲越嚟越鍾意食濃味食物 tim，冇刻意介口喎，我由細大都抗拒肥肉，如燒肉皮，燒鴨皮，就連吃臘腸，好奇怪地會自動吐返啲肥肉粒，日積月累下來，再加上我十多年前就開始食用芥花子油有關呢？

膽固醇驗血報告，2012/2010
Cholesterol (TC) 總膽固醇 4.1/4.8
HDL - cholesterol 高密度膽固醇1.7/1.5
Triglyceride (TG) 三酸甘油脂 0.3/0.5
LDL-cholesterol低密度膽固醇2.3/3.1

 過去式的山水畫功課，當時覺得很不錯，而家再睇返，噢~~~羞死人，地面有冇窿？
 現在式的山水畫功課，多年後睇返可能亦會搵窿“捐”，咁係好嘅，證明我有進步。

未完成畫作

丹霞後遺症

回家第一日香港吹強勁東風，如果係以前，我會覺得啲風好涼爽好正，但當體會過早晨時候丹霞山腳清風嗰陣，香港嘅顯然被比下去，唔夠清涼。

平時我搭車經過元朗外圍會覺得草木青蔥，但當體會過周圍觸目都係綠油油嗰陣，元朗嗰種綠係帶灰色的，唔夠青蔥。

返嚟個幾星期，仲係成日夢到自己喺山裏轉，唔通我要搵個深山隱居？

好綠啊！雖然阿仔話佢映嘅植物都可以咁綠，但經過相機出嚟嘅綠色，同親身體會又點可以同日而語呢！映呢張相嘅原因其實比較另類，就係工筆畫裏千方百計都調教唔到綠色嘅層次，喺呢一堆雜草叢生嘅河畔植物裏一覽無遺。

新聞三則

荷蘭牛奶品質的奧秘

http://www.chinareviewnews.com/doc/1021/2/6/4/102126493.html?coluid=7&kindid=0&docid=102126493&mdate=0531115911

 “老丹”——珠峰國家公園中的垃圾背夫

http://www.chinareviewnews.com/doc/1021/2/6/7/102126777.html?coluid=91&kindid=2751&docid=102126777&mdate=0531170206

“近八成孩子不快樂”源於人文關懷缺乏

http://www.chinareviewnews.com/doc/1021/2/6/9/102126934.html?coluid=123&kindid=0&docid=102126934&mdate=0531180909

Blogger 升級仲冇咁好用，搞乜鬼呀！

“陽元石”

民宿窗外看到陽元石旁邊山頂的涼亭，不過還好陽元石被一小山遮掩，唔駛我日日起床就睇到呢個討厭石，涼亭所處景點係“群象出山”其中一個山頭。“群象出山”“陽元石”，位處“陽元山景區”，同我哋住嘅“長老峰景區”只係一河之隔，而“陰元石”就喺“長老峰景區”，但因為路途更遠，又同我哋所走嘅路線不同，主要亦係對呢塊“陰元石”冇興趣，所以就冇再特意上山。

丹霞之旅照片的最愛和最厭惡

今次決定丹霞行實在匆忙， 由決定到確實只有個多星期，但亦有幸 carmen 有朋友在韶關，而佢自己亦去過韶關幾次，雖然未到熟門熟路，但比起我這個完全未踏足過韶關的好太多。

今次拍咗六百幾張照片，其中有兩張係至愛，一張討厭，但又唔拍唔得，冇理由一場嚟到，將一個著名景點置之不理㗎~
最愛的其中一張
韶音亭外的遠、中、近，還有遠方的炊煙，好有畫意架~

另一張最愛
呢張係民宿後門的休閒步道，河道旁邊一張竹筏，又係一張可以入畫嘅景象。

最討厭
點解所有宣傳都主打呢個景呢，唔通係中國人“恨”仔嘅表現？

每誕生新一批大熊貓，就把舊的大熊貓忘在角落，或賣給一些設施落後的動物園，連樹也沒一棵的所謂戶外，大太陽底下叫牠們往哪躲啊！
不要再繁殖大熊貓了，繁殖那麼多又不能回歸野外，不斷的往外或送或賣的，不如將$$$都用在保護綠色的野外吧！不要發展生態旅遊喇！發展這類生態公園為的仍是一個字，錢~~一大堆遊人湧往公園，野外動物哪有安寧日子啊！

近大半年肥咗好多，前兩年買嘅褲勉強拉得埋，真怕會迫爆~~

自從 carmen 因工輟學之後，放學後只餘自己一個人閒逛一陣再回家，上月 carmen 回歸畫班，一來開心終於有人同自己同聲同氣(講畫)，二來又有人一起午膳，一樂也。

上個月有一次放學後同老師飲茶，當然順道諮詢一下有關畫畫嘅問題，當初學意筆山水為的是要學畫樹，但學咗兩年意筆，我畫出嚟嘅總帶極重工筆風，但老師話我呢種風格將會跟我一世，改唔到，而且唔好改，佢話好多人“恨”都“恨”唔到，我都有發現呢一班同學中真係冇人“恨”得到，可能同我之前學過工筆有極大關係，但我心諗，以前學嘅只係工筆花卉，冇畫過工筆樹，而且以前成日被老師閙話我畫嘅花枝唔夠蒼老，而家我畫嘅樹成日被讚都係因為睇咗一篇教材而有所領悟，同樹一樣，石頭我亦都係畫得差，雖然有睇好多教材，但就冇心機去鑽研，可能我真係好鍾意畫樹。

噚日同 carmen 喺一間小型茶餐廳傾畫傾到不亦樂乎 ，有點不好意思阻人做生意，但真好耐冇咁樣論畫囉~

首先要謝謝 Gloria 這幾天的幫忙。
契媽出咗院兩日，聽日印傭唔放假幫手，我怕的是佢捱唔住要遲工，契哥話契媽而家冇晒力，佢哋亦攙扶得辛苦，佢喺電話裏聲線都沉咗啲，可能太辛苦。
可能自家老爸走得乾脆，所以呢次契媽嘅情況我會替契哥辛苦，但我始終係外人， 唔可以叫佢入護理院。
年青守寡，辛辛苦苦養大兩個仔嘅契媽，一個仔移民多年，就只近七八年至話喺香港買樓供養老母親，另一個雖然心裏有阿媽，但老婆心裏沒奶奶，連我老公都問究竟佢孫仔孫女知否還有一個嫲嫲，所以話契媽辛苦大半世，獨立咗大半世，而家至話呢樣唔準，嗰樣唔可以做，佢又點會聽得入耳丫。