梅州客家文化交流團，起初我以為只係一個普通短線旅行，然後在當地搞一個自家畫會雅集，誰知原來係連同五華縣藝術界一齊交流，睇到老師們即席示範，眼界大開之餘，令我有另一種感觸的是前來參與的內地藝術家都以中年人居多，更有部份看上去年紀不超過三十，香港寫得一手好字的全部年過六、七十的老人家，可以說後繼無人，內地的小學(or 中學)就有藝術科，一條龍教育培養藝術家，香港的根本欠缺基本訓練，都是退休後自娛。

照片裏揮毫的是香港人，背後觀看的是內地人，我們後繼無人啊！

眼睛

最近無心山水，摷返觀音白描出嚟練習，一路以嚟好怕畫動物(包括人物)，只因為畫唔出動物嘅眼神，前幾日睇韓劇時差啲要大叫三聲，原來垂低嘅眼睛係咁樣嘅，上眼簾嘅形態、眼珠嘅位置等等，同觀音白描稿全部一致，Carmen 話我喺人物方面有覺悟，又因為我嘅畫比較仔細，可以繼續落去，但我做嘢一向都係睇心情，好似今日咁，牡丹白描畫極都唔順手，冇心機~~

垂低嘅眼睛係咪同觀音稿裏嘅好相似呢！

新增說明文字

觀音白描稿

事緣老師因為做白內障要休息三個月，呢三個月同學們只需支付租金，上堂時大家開懷畫畫，同時又可以看一下別人如何下筆，捨短取長，一定互有裨益。

學咗幾年畫，今日第一次看到同學們即席揮毫，今日午飯時 carmen 就同學們的畫畫問題傾咗好多，不能不佩服 carmen 觀察入微，對每個同學的長短都分析得清清楚楚，同時又好開心我的畫被 carmen 讚賞，我話我都係臨摹古畫，佢嘅見解係，我嘅畫技巧方面並不是無可挑剔，反而係看得到我畫畫時係融入畫中，而佢更喜歡我畫嘅觀音白描，佢話畫作俾到人平靜祥和嘅感覺。

我呢，雖然有留意同學們揮毫，但就冇carmen 觀察入微嘅眼光。

男男的比較

最近回復多年前追流星時的狀態，一劇接一劇的追看，睇完兩套“宋昌義”的，現正在看“李尚禹”的，得出一個結論，演劇學系畢業的果然比較有看頭，“人生真美麗”除咗支線太多之外，亦因為有一群好戲之人，睇過“李尚禹”的“別再猶豫”就知男男戀之間的對手戲那麼好看亦是因為有“宋昌義”帶入戲，殘酷的講一句，“李尚禹”除咗外型高大、笑容甜美之外，感情戲唔掂、咬字唔掂，究竟當初邊個挖佢拍劇架！

“黃金新娘”

繼“人生真美麗”後的另一套長篇韓劇“黃金新娘”，劇集描述越南新娘嫁給了韓國男人的愛情故事，又係64集，睇到22集，難為女角一集一小喊，兩集一大喊，努力中~

劇集係07年出品，雖然主要係睇“宋昌義”，但到現時為止，劇集裏最吸引我的反而係做媽媽嗰位演員，有啲面熟，但唔知名字。

好鍾意女角呢笑容

剛剛和契媽飲茶，與契哥閒聊講起 Gloria 於貴州所見，講到貴州崎嶇的山路、缺水令人們清潔衛生成問題、知道有外人到訪，孩子們把家裏最好的衣服都穿上，等等…等等時，眼淚尚忍得住，但當講到貴州的孩子們連吃飯也成問題，一日的食糧就只得學校供應的午飯，學校的午飯成為上學主因，我即刻忍不了，雖未致眼淚直流，但已經哽咽不能語。

終於睇完“人生真美麗”，最初吸引我嘅係佢 sell 同性戀，睇咗兩集就知原來完全唔係嗰回事，故事就如韓版真情，一家十口阿婆阿媽咁每人一條支線，雖然全部演員都係好戲之人，但六十三集仍然睇到想死，一集一個鐘幾條支線，邊有咁多同性題材可以講丫，聽說合家歡時間播出，有家長抗拒同性題材，最終出街嗰陣佢兩個只係摟摟抱抱了事，連 kiss 也欠奉，畫完牡丹之後連追幾日，雖然兩個都唔係靚仔型，但都係中招，可能同同性戀呢個題材有關，喺我嘅歷史裏迷戀呢回事相信唔超過一個月。

給 Julie 的生日禮物

分染篇：上個月去澳門睇畫展回來後挑起畫工筆條癮，又因為 Julie 生日近，於是的起心肝摷稿練習，久疏練習工筆畫，齋練鈎線就畫咗好幾張，做色又畫咗兩張，第一張想畫白色花朵，於是花瓣部份用翠綠分染，唔可以話好成功，但一啲難度都冇，只染咗三次就搞定，到葉子部份，呢個喺我嚟講是難的，因為葉子多而繁雜，要做到層次光暗，還要分染時不能起漬，顏色要到邊，最重要係我從來都調教唔到最後要平塗的綠色，雖然時間尚且充裕，抱住死就死嘅心態，點知就真係死咗，因為時間緊迫，又因為剛起的稿不能立即做色，於是二話不說漏夜再起一張新稿留待第二天做色，今次打算用墨色做葉子，但花朵部份用乜嘢色呢，因為如果做淺色的花就要用淺墨起稿，我打算做硃紅色的花，於是就用中墨起稿，分染硃紅色的花並唔係用紅色。而係用花青色(藍色)，用花青色分染又比翠綠難，色太濃的話好難推得開，要推得開就要用極淡的花青色，慢慢一層一層的染，齋分染花朵部份用咗三日，因為要有自然光(陽光)，每朝十點多到下午三點多，花朵部份分染完後其實應該平塗硃紅色，咁紅色的花朵就會出現，但平塗紅色亦不易，做得唔好紅色會變灰，唔夠紅潤豔麗，所以就先向墨色葉子埋手，用墨分染嘅難處係墨汁有膠質，太濃的話推唔開，又係要一層一層慢慢的染，因為葉子多，所以分染葉子做咗好幾天，葉子部份比我想像中做得好，全部完工後再看染成藍色的花朵也不差，也好清雅，雖然花朵的鈎線比較深色，但尚可接受，最終定案係藍色。


裱畫篇：畫又唔係自己裱，點解要特意講解裱畫？皆因家裏有幾張先人留下的舊畫，好喜歡嗰種裝裱方式，又易收藏，又因為懶帶舊畫做版，去“文雅堂”講明要求，但原來係冇用，裱出嚟又係兩回事，舊的硬淨清雅，新的較薄弱，而且無端係表面多貼一小張顏色紙，裏面一面係畫一面係白紙，因為字體唔靚冇預計提字的我即刻呆晒，老闆話唔提字亦可，但唔提字又太空白，又要上網摷牡丹詩句又要練字，最終變成圖中模樣。

PS：畫畫係我興趣，廖太們唔駛唔好意思，反而難為你們收到拙作當禮物。

新舊畫裝裱的比較

亞四外婆走了，退一步想佢冇乜病痛之下走亦係一種福氣。

回看我契媽一直冇好亦冇壞咁躺在床，已經不可能期望佢自己有力落地，契哥壓力亦好大，一邊不放心契媽一個人在港，一邊老婆在美，又因為前幾年知道契媽肺有陰影後，退晒所有生意，一心回港照顧母親，簿仔裏的 $$$$就用一蚊少一蚊，呢個又係壓力。

我呢，既然契哥唔想契媽住老人院，我能幫的就幫，其餘的真係愛莫能助。

先要謝謝廖太們，呢件事令我感到原來人可以改變咁大。

另一件事，再謝謝同學仔 carmen 和阿妹，提醒咗我完全冇意識過嘅後果，雖然現階段雙方完全信賴，但唔代表冇意外，如果出意外我係承擔唔起的，喺我思維模式裏只想幫人，我就係冇諗過呢個意外。

幾十年都喺溫室裏，講好聽啲呢兩件事更令我知道自己太單(蠢)，難聽啲其實係低 B~~~~

再失敗

上次山水畫失敗後再畫過另一張工筆畫，仍然以失敗告終，只因為以前畫得到嘅工筆，又完全冇諗過太耐冇畫工筆，太自負通常都會衰收尾，上次山水畫失敗在遠山太重手，今次工筆失敗原因仍然係太重手，再繼續另一張，但唔知趕得及否，唔通又要諗過另一個方案？

鬥咗兩日生日禮物，都係失敗，仲有個多星期咋，趕唔到的話又要諗過另一個方案囉~

海濤畫會第六屆會員作品展

海濤畫會第六屆會員作品展
地點：香港文化中心行政大樓四樓展覽館
日期：2012-07-27至29
時間：27日 ─   3 pm 至 7 pm
            28日 ─ 10 am 至 7 pm
            29日 ─ 10 am 至 6 pm   

歡迎光臨指導

會員作品展場刊

我的展品─臨朗世寧松樹

膽固醇驗血報告

噚日睇膽固醇驗血報告，上次嘅驗血報告已經比未食血壓藥之前差，事隔兩年，今次就諗又唔知退化成點，點知出乎意料之外的好，醫生問我食嘢係咪好清淡，我話一向以嚟都唔鍾意太肥膩食物，但心諗，我仲越嚟越鍾意食濃味食物 tim，冇刻意介口喎，我由細大都抗拒肥肉，如燒肉皮，燒鴨皮，就連吃臘腸，好奇怪地會自動吐返啲肥肉粒，日積月累下來，再加上我十多年前就開始食用芥花子油有關呢？

膽固醇驗血報告，2012/2010
Cholesterol (TC) 總膽固醇 4.1/4.8
HDL - cholesterol 高密度膽固醇1.7/1.5
Triglyceride (TG) 三酸甘油脂 0.3/0.5
LDL-cholesterol低密度膽固醇2.3/3.1

 過去式的山水畫功課，當時覺得很不錯，而家再睇返，噢~~~羞死人，地面有冇窿？
 現在式的山水畫功課，多年後睇返可能亦會搵窿“捐”，咁係好嘅，證明我有進步。

未完成畫作

丹霞後遺症

回家第一日香港吹強勁東風，如果係以前，我會覺得啲風好涼爽好正，但當體會過早晨時候丹霞山腳清風嗰陣，香港嘅顯然被比下去，唔夠清涼。

平時我搭車經過元朗外圍會覺得草木青蔥，但當體會過周圍觸目都係綠油油嗰陣，元朗嗰種綠係帶灰色的，唔夠青蔥。

返嚟個幾星期，仲係成日夢到自己喺山裏轉，唔通我要搵個深山隱居？

好綠啊！雖然阿仔話佢映嘅植物都可以咁綠，但經過相機出嚟嘅綠色，同親身體會又點可以同日而語呢！映呢張相嘅原因其實比較另類，就係工筆畫裏千方百計都調教唔到綠色嘅層次，喺呢一堆雜草叢生嘅河畔植物裏一覽無遺。

新聞三則

荷蘭牛奶品質的奧秘

http://www.chinareviewnews.com/doc/1021/2/6/4/102126493.html?coluid=7&kindid=0&docid=102126493&mdate=0531115911

 “老丹”——珠峰國家公園中的垃圾背夫

http://www.chinareviewnews.com/doc/1021/2/6/7/102126777.html?coluid=91&kindid=2751&docid=102126777&mdate=0531170206

“近八成孩子不快樂”源於人文關懷缺乏

http://www.chinareviewnews.com/doc/1021/2/6/9/102126934.html?coluid=123&kindid=0&docid=102126934&mdate=0531180909

Blogger 升級仲冇咁好用，搞乜鬼呀！