近大半年肥咗好多，前兩年買嘅褲勉強拉得埋，真怕會迫爆~~

自從 carmen 因工輟學之後，放學後只餘自己一個人閒逛一陣再回家，上月 carmen 回歸畫班，一來開心終於有人同自己同聲同氣(講畫)，二來又有人一起午膳，一樂也。

上個月有一次放學後同老師飲茶，當然順道諮詢一下有關畫畫嘅問題，當初學意筆山水為的是要學畫樹，但學咗兩年意筆，我畫出嚟嘅總帶極重工筆風，但老師話我呢種風格將會跟我一世，改唔到，而且唔好改，佢話好多人“恨”都“恨”唔到，我都有發現呢一班同學中真係冇人“恨”得到，可能同我之前學過工筆有極大關係，但我心諗，以前學嘅只係工筆花卉，冇畫過工筆樹，而且以前成日被老師閙話我畫嘅花枝唔夠蒼老，而家我畫嘅樹成日被讚都係因為睇咗一篇教材而有所領悟，同樹一樣，石頭我亦都係畫得差，雖然有睇好多教材，但就冇心機去鑽研，可能我真係好鍾意畫樹。

噚日同 carmen 喺一間小型茶餐廳傾畫傾到不亦樂乎 ，有點不好意思阻人做生意，但真好耐冇咁樣論畫囉~

首先要謝謝 Gloria 這幾天的幫忙。
契媽出咗院兩日，聽日印傭唔放假幫手，我怕的是佢捱唔住要遲工，契哥話契媽而家冇晒力，佢哋亦攙扶得辛苦，佢喺電話裏聲線都沉咗啲，可能太辛苦。
可能自家老爸走得乾脆，所以呢次契媽嘅情況我會替契哥辛苦，但我始終係外人， 唔可以叫佢入護理院。
年青守寡，辛辛苦苦養大兩個仔嘅契媽，一個仔移民多年，就只近七八年至話喺香港買樓供養老母親，另一個雖然心裏有阿媽，但老婆心裏沒奶奶，連我老公都問究竟佢孫仔孫女知否還有一個嫲嫲，所以話契媽辛苦大半世，獨立咗大半世，而家至話呢樣唔準，嗰樣唔可以做，佢又點會聽得入耳丫。

契哥接到醫生來電約見談及契媽病情，佢叫埋我去好等有個商量，應該都唔慌好野，唉~~我咁眼淺，萬一有乜惡耗，到時都唔知係佢安慰我定係我安慰佢。

啱啱睇到一個有關虐畜的圖片，今次真係冇心睇架，一點入去就睇到一張咁嘅圖，今晚又訓唔著，人越嚟變態，呢啲賤人拎去打靶都便宜咗佢，以其人之道還自其人之身至啱，忽發奇想，聖經裏的天火焚城並唔係過去的傳說，而係先知們對現今世界的預言。

今日趁好天去攞藥，明知星期六醫生特別忙都要去，冇法，血壓藥只餘五日貨仔，醫生話前兩日冇人，點解我唔嚟，醫生大人，前兩日黃雨呀，我住得遠，你以為我住診所隔離咩，雖然車程廿分鐘，但要轉車，計埋等車大半粒鐘至去得到o架，唉~~次次睇醫生最少都要等兩個幾鐘，計埋車程，半日唔少得。

回程接到契哥電話，契媽入咗院，但今次話胃好痛，平時契媽已經好忍得痛，今次可能有事，機能退化樣樣一齊嚟~~

宇宙解碼

宇宙解碼第1集 - Extreme Stars
太陽內部有核聚變，所以有張力，驅動恒星的是重力，重力壓著太陽外層，核聚變和重力互相角力互相抗衡而形成太陽，但燃料會有用盡的一天，氫逐漸減少，核聚變減弱，重力向內壓縮，核聚變加熱太陽外層使太陽體積變大，成為紅巨星，然後脹大的太陽吞沒一切，包括地球，當氣用盡，恒星會燃燒氦而聚合成碳，核心的能量波會炸毀外層，恒星滅亡，核聚變停止成為白矮星。
但如果比太陽更大的恒星死亡，超新星爆炸，留下超稠密核心，中子星。

宇宙解碼第2集 - Black Holes
黑洞如何形成？黑洞主導宇宙的進化？銀河系是圍繞著黑洞運行的其中一個星系？黑洞是通往另一個宇宙的通道？月球圍繞著地球，地球圍繞著太陽，太陽圍繞著什麼？

恒星死亡，有靜靜的死，亦有會大爆炸的，另外有些會形成黑洞。
黑洞靠的是引力，當比太陽大十倍的恒星死亡，會在引力的擠壓下發生爆炸形成超新星。

若比太陽大100倍的恒星死亡爆炸，則形成特超新星，到時內核停止活動，外核向內擠壓，內部形成黑洞，死亡恒星內心的新生黑洞形成的巨大引力吞噬剩餘的恒星外部物質，於是產生磁力和磨擦力而噴出巨大能量發生爆炸，新生黑洞和兩道以光速穿越宇宙的能量速─伽馬射線暴誕生。

通過計算伽馬射線暴，推算出宇宙有數以十億計的黑洞存在，其中一個還潛伏在銀河系中心。

銀河系裏數以十億的恒星全部圍繞一個神秘區域旋轉，而只有超大質量黑洞才有牽動所有恒星的引力，這些恒星說明了中心有一個質量為太陽400萬倍的黑洞存在著。
超新星爆炸形成大量黑洞，無數小黑洞融合而成超大質量黑洞，當超大質量黑洞無法再吸納周圍氣體時，會噴出大量氣體，形成巨大能量流，這個超大質量黑洞成為類星體，當氣體噴盡，類星體亦停止，只餘超大質量黑洞和周圍年輕的恒星，銀河系就此形成。

不自量力兼眼高手低的作品

臨清 朗世寧 百駿圖長卷局部，一如標題說的，非常的眼高手低。
名為百駿圖，原圖當然畫有多只馬匹，有打鬥的，有戲水的，也有吃草的，但我不懂畫馬，只因好喜歡畫中蒼勁又濃密的老松，開始畫的當下完全不當一回事，拿出稿子就試畫，而一直也是有心情就畫兩筆，沒心情就放一旁不管不顧，因為老師畫大寫意，我這一張是工筆山水，所以開始時給老師改動少許之後，到完工時只讓他給意見，由去年約十一月到今年三月，原來足有半年。
雖然說眼高手低，但自己認為己經不錯，也不敢再有加減，裱畫店李生也說：不錯哦~進步很大哦~
哈~~開心得我~~

題外話，經過十多次失敗的拍照，才有一張稍好的照片，阿仔嘮嘮叨叨的，但又不肯幫手，又說為何不用腳架，氣得我~~不肯幫手拍照的請收口~~

我看見-張信哲2012年世界巡迴演唱會

上次廖太生日時路經鍰鑼灣至突然想起呢個演唱會，雖然時已近七點半，通利可能收咗工，但即管上去睇吓，還好趕得切，睇咗一輪坐位表，嘩~駛唔駛咁多留位呀！算~旁邊就旁邊啦，然後售票員俾我睇佢幫我揀嘅位置時，咦~~對正台嘅唔係留晒喇咩？售票話係贊助商拎返出嚟嘅，正面台架，我心諗就係因為正面台至最遠呀，仲27行添，又高又遠，不過算啦，幾次睇張信哲都冇試過正面，今次佢話用舞台劇形式咁就試吓啦！
原來老張感冒，聲音有啲沙啞，難怪有時唱錯歌詞有時又入唔到，有一首佢講完一堆嘢之後，鋼琴以為可以開始另一首，彈咗幾個音後俾老張喊CUT，佢話未準備好，咁都得？不過佢係病人嘛，原諒佢啦！

噚晚去到一睇，噢~~舞台都係巡迴整個大陸至嚟到香港。

比較新穎係台後嘅大屏幕，咁多張背景我最鍾意第一張呢個，有啲似“魔戒”，間中有一大堆烏鴉飛出，但我仍然唔明所有歌曲同背景有何關係！

第二喜歡嘅背景，好教堂啊！

映得最近又最清的一張，果然 14 X。

田園山水畫法

噚日上堂，老師帶咗好幾本畫集借俾同學們參考，其中呢本借給我的畫集書有半吋厚，一半字一半圖，詳列畫畫法門，希望有耐性看完，可惜書已絕版，上網已找不到，想買也沒處買囉~

有病？係出新芽至真。

上星期返學時喺車站見到成地落葉，奇怪呢棵樹點解春天至落葉？唔通有病？

原來唔係有病，係出新芽至真。

今晚開始適應煮完飯分餸嘅日子，一家四口，四個不同嘅食飯時間外加一個帶飯，咁即係最少要分五份，另外又要諗第二日中午飯，所謂早上，其實約十一點半開餐，還好呢一餐阿仔自己識搞，只要我準備好餸就 OK，唔得閒又唔係，好得閒又唔係，可以持續幾耐諗餸嘅日子呢？

超市半日遊

今日行程，一次街市，二次惠康，一次百佳，名副其實超市半日遊。
今朝去街市買菜，再去惠康買豬肉，回家後接到契哥約去飲茶嘅電話，又因酒樓喺百佳附近，飲茶後順道去百佳逛一逛，當然又買少少食物咁啦，回家後至發覺忘了買豆腐泡，中午又再去惠康買豆腐泡，咁又完成超市半日遊，人都癲~~~

全自動和全手動

阿仔嘅$6000禮物Canon PowerShot G12，送俾我咁耐都冇心機學全手動，今日呢棵玉蘭想唔試全手動都唔得，出奇地今年花展有好多地區都用上玉蘭，但大都又謝又殘，只得呢一棵正好盛放，但背光利害，映極都唔掂，用閃燈又唔靚，終於要問阿仔點樣教全手動，噢~~原來咁易，就只差喺相機個mon睇同電腦mon睇嘅分別。

全自動嘅玉蘭

全手動，雖然天空有啲曝光過咗，但我己經好滿意喇！

天女散花

今日放學後約埋阿仔去花展映相，全場設計最鍾意都係呢個，只因佢同一張國畫太相似，國畫名“天水散花”，不過一向左散，一個向右散咁啫，又因為背光，於是嘗試全手動，背景天空曝光過度，但冇photo之下又想睇得到就只有這樣喇！

國畫“雨霽藍天 - 天女散花”，如無記錯的話，呢張畫嘅作者“雨霽藍天”好似都係臨佢老師嘅作品。花展設計同呢張國畫有80巴仙相似，算唔算侵犯版權呢？

起身嗰一刻仍會天旋地轉，頭有時仍會“赤赤脹脹”感覺，究竟係咪耳水不平衡架，食咗一星期藥，食到好悶，噚日醫生話：“得喇，食埋呢兩日藥冇事喇！”但我今朝起身仲係天旋地轉喎，係咪唔駛理佢自己會好架醫生。

契媽出咗院，我諗係佢成日想出院，所以醫生至問佢想唔想返屋企，否則以17x嘅血壓，點會咁輕易放佢走。
噚日去探佢見佢精神唔錯，但雙腳冇力，我懷疑契哥仲可否港美兩邊走，如果佢走咗只得印傭一個點應付日常生活？契哥話契媽脾氣燥咗好多，梗係啦，一個“蘿柚唔黐凳”嘅人而家行半步都要人攙扶，又唔肯用拐杖，難為服侍嘅契哥同印傭，我哋問佢認唔認得邊個邊個，佢認得之餘仲閙我哋當佢係傻子，唉~~咁佢喺醫院試過連自己個仔都唔認得丫嘛~~嗰次連醫生都漏夜嚟同佢檢查，怕佢中風，照過腦掃描好彩又冇事咋~~

有時會諗老爸走得咁突然，喺我哋嚟講亦係一種福氣。

今朝好啲，起碼冇噚日咁 wing 吓wing吓，噚日等睇醫生等咗三粒鐘，坐喺度都訓得著，梁兆基話係病毒影響耳水不平衡，還好只係好輕微，冇作嘔作悶~~

唉~~~一屋細菌人~~~

噚日去醫院探契媽，契媽前日唔認得契哥之餘，仲成日訓，冇乜意識，噚日朝做過腦掃描，除咗退化之外還好冇出血情況，但就退化同血壓始終17x，而血壓藥有啲佢又唔食得，有啲食咗腳腫，有啲食咗痛風，連平時食咗冇事嘅，今次都乜鬼副作用亦出晒嚟，醫生話而要慢慢試，但慢慢試呢個詞真係好磨人，一個平時愛乾淨嘅人，而家包住尿片訓喺床，佢辛苦之餘，佢身邊嘅人亦辛苦，噚日見佢又同平時差不多，未致到唔認得人但精神都係差嘅，餐餐都係食粥，邊有營養呀！
離開後同阿妹去元朗食晏，途經一天橋旁有一棵好高好茂盛嘅木棉，可能之前天氣熱，所以木棉開滿花雷，記得小時候嘅木棉係落完葉至開花，而家花又有葉又有，地上連落花都有，究竟係乜嘢天呀！

好茂密嘅木棉花

迫埋一堆嘅花雷

契媽同老爸

契媽仲未出得院，契哥話前兩年契媽氣喘入院時有俾佢吸氧氣，但今次冇，照契哥估計，呢一次氣喘係因為心臟衰弱，跟以往嘅肺積水唔同，亦因為咁，出院嘅日子會否變得遙不可及？醫院因為怕老人家跌倒而唔俾佢落床，佢平時如果坐太耐或訓醒起身，都要企一陣至行到，所以契媽住咗兩日腳就冇力，有兩個人攙扶都企唔穩，我怕嘅係佢要喺醫院入折磨。

眼見契媽而家情況又諗起老爸，老爸臨走前幾年已經冇返香港，除咗頭痛完全唔覺佢有其他咁又突然走咗，好意外，如果佢仲喺香港會點？即刻999，急救~~急救~~

契媽入院時佢自己話今次入院唔知有冇出院日子，契媽同老爸兩者有乜唔同？急救之後受折磨好？安安樂樂地家中離開好？

節錄：《熊貓史詩》

無意之中搵到（方敏著長篇紀實文學《熊貓史詩》）
黑色字體為節錄：
2003年10月，祥祥放歸野外。

2004年，祥祥真的吃苦了。祥祥沒有媽媽教，祥祥不知道，濕地不能當鋪睡！狂風暴雨劈頭蓋臉打下來，躲哪里？祥祥還是不知道。
人們幾乎見不到了，窩窩頭也一丁點都不給了。
有一天有人來偷看，祥祥發現了，怒氣衝衝大聲吼，追著那人張牙舞爪。
那人說：“我是劉斌啊，幼稚園的飼養員，從小就養你疼你照顧你，不記得了？”
祥祥瞪圓眼睛瞧了瞧，接著追，接著吼，這塊領地歸祥祥，誰來都不行！

2006年底祥祥瘦得皮包骨，輕飄飄地被抬到擔架上搶救回來！後來，祥祥傷好之後又回到野外。

2007年的春天祥祥去世了！


看到“祥祥沒有媽媽教”這一句，哭~~野外的貓會跟媽媽年半至兩年，圈養的貓只跟媽媽半年，不是找到食物、有洞穴棲身就可解決，什麼野外求生的技巧都沒學過，怎能隨便放到野外，如果我係祥祥，我會怨人類。