今晚開始適應煮完飯分餸嘅日子，一家四口，四個不同嘅食飯時間外加一個帶飯，咁即係最少要分五份，另外又要諗第二日中午飯，所謂早上，其實約十一點半開餐，還好呢一餐阿仔自己識搞，只要我準備好餸就 OK，唔得閒又唔係，好得閒又唔係，可以持續幾耐諗餸嘅日子呢？

超市半日遊

今日行程，一次街市，二次惠康，一次百佳，名副其實超市半日遊。
今朝去街市買菜，再去惠康買豬肉，回家後接到契哥約去飲茶嘅電話，又因酒樓喺百佳附近，飲茶後順道去百佳逛一逛，當然又買少少食物咁啦，回家後至發覺忘了買豆腐泡，中午又再去惠康買豆腐泡，咁又完成超市半日遊，人都癲~~~

全自動和全手動

阿仔嘅$6000禮物Canon PowerShot G12，送俾我咁耐都冇心機學全手動，今日呢棵玉蘭想唔試全手動都唔得，出奇地今年花展有好多地區都用上玉蘭，但大都又謝又殘，只得呢一棵正好盛放，但背光利害，映極都唔掂，用閃燈又唔靚，終於要問阿仔點樣教全手動，噢~~原來咁易，就只差喺相機個mon睇同電腦mon睇嘅分別。

全自動嘅玉蘭

全手動，雖然天空有啲曝光過咗，但我己經好滿意喇！

天女散花

今日放學後約埋阿仔去花展映相，全場設計最鍾意都係呢個，只因佢同一張國畫太相似，國畫名“天水散花”，不過一向左散，一個向右散咁啫，又因為背光，於是嘗試全手動，背景天空曝光過度，但冇photo之下又想睇得到就只有這樣喇！

國畫“雨霽藍天 - 天女散花”，如無記錯的話，呢張畫嘅作者“雨霽藍天”好似都係臨佢老師嘅作品。花展設計同呢張國畫有80巴仙相似，算唔算侵犯版權呢？

起身嗰一刻仍會天旋地轉，頭有時仍會“赤赤脹脹”感覺，究竟係咪耳水不平衡架，食咗一星期藥，食到好悶，噚日醫生話：“得喇，食埋呢兩日藥冇事喇！”但我今朝起身仲係天旋地轉喎，係咪唔駛理佢自己會好架醫生。

契媽出咗院，我諗係佢成日想出院，所以醫生至問佢想唔想返屋企，否則以17x嘅血壓，點會咁輕易放佢走。
噚日去探佢見佢精神唔錯，但雙腳冇力，我懷疑契哥仲可否港美兩邊走，如果佢走咗只得印傭一個點應付日常生活？契哥話契媽脾氣燥咗好多，梗係啦，一個“蘿柚唔黐凳”嘅人而家行半步都要人攙扶，又唔肯用拐杖，難為服侍嘅契哥同印傭，我哋問佢認唔認得邊個邊個，佢認得之餘仲閙我哋當佢係傻子，唉~~咁佢喺醫院試過連自己個仔都唔認得丫嘛~~嗰次連醫生都漏夜嚟同佢檢查，怕佢中風，照過腦掃描好彩又冇事咋~~

有時會諗老爸走得咁突然，喺我哋嚟講亦係一種福氣。

今朝好啲，起碼冇噚日咁 wing 吓wing吓，噚日等睇醫生等咗三粒鐘，坐喺度都訓得著，梁兆基話係病毒影響耳水不平衡，還好只係好輕微，冇作嘔作悶~~

唉~~~一屋細菌人~~~

噚日去醫院探契媽，契媽前日唔認得契哥之餘，仲成日訓，冇乜意識，噚日朝做過腦掃描，除咗退化之外還好冇出血情況，但就退化同血壓始終17x，而血壓藥有啲佢又唔食得，有啲食咗腳腫，有啲食咗痛風，連平時食咗冇事嘅，今次都乜鬼副作用亦出晒嚟，醫生話而要慢慢試，但慢慢試呢個詞真係好磨人，一個平時愛乾淨嘅人，而家包住尿片訓喺床，佢辛苦之餘，佢身邊嘅人亦辛苦，噚日見佢又同平時差不多，未致到唔認得人但精神都係差嘅，餐餐都係食粥，邊有營養呀！
離開後同阿妹去元朗食晏，途經一天橋旁有一棵好高好茂盛嘅木棉，可能之前天氣熱，所以木棉開滿花雷，記得小時候嘅木棉係落完葉至開花，而家花又有葉又有，地上連落花都有，究竟係乜嘢天呀！

好茂密嘅木棉花

迫埋一堆嘅花雷

契媽同老爸

契媽仲未出得院，契哥話前兩年契媽氣喘入院時有俾佢吸氧氣，但今次冇，照契哥估計，呢一次氣喘係因為心臟衰弱，跟以往嘅肺積水唔同，亦因為咁，出院嘅日子會否變得遙不可及？醫院因為怕老人家跌倒而唔俾佢落床，佢平時如果坐太耐或訓醒起身，都要企一陣至行到，所以契媽住咗兩日腳就冇力，有兩個人攙扶都企唔穩，我怕嘅係佢要喺醫院入折磨。

眼見契媽而家情況又諗起老爸，老爸臨走前幾年已經冇返香港，除咗頭痛完全唔覺佢有其他咁又突然走咗，好意外，如果佢仲喺香港會點？即刻999，急救~~急救~~

契媽入院時佢自己話今次入院唔知有冇出院日子，契媽同老爸兩者有乜唔同？急救之後受折磨好？安安樂樂地家中離開好？

節錄：《熊貓史詩》

無意之中搵到（方敏著長篇紀實文學《熊貓史詩》）
黑色字體為節錄：
2003年10月，祥祥放歸野外。

2004年，祥祥真的吃苦了。祥祥沒有媽媽教，祥祥不知道，濕地不能當鋪睡！狂風暴雨劈頭蓋臉打下來，躲哪里？祥祥還是不知道。
人們幾乎見不到了，窩窩頭也一丁點都不給了。
有一天有人來偷看，祥祥發現了，怒氣衝衝大聲吼，追著那人張牙舞爪。
那人說：“我是劉斌啊，幼稚園的飼養員，從小就養你疼你照顧你，不記得了？”
祥祥瞪圓眼睛瞧了瞧，接著追，接著吼，這塊領地歸祥祥，誰來都不行！

2006年底祥祥瘦得皮包骨，輕飄飄地被抬到擔架上搶救回來！後來，祥祥傷好之後又回到野外。

2007年的春天祥祥去世了！


看到“祥祥沒有媽媽教”這一句，哭~~野外的貓會跟媽媽年半至兩年，圈養的貓只跟媽媽半年，不是找到食物、有洞穴棲身就可解決，什麼野外求生的技巧都沒學過，怎能隨便放到野外，如果我係祥祥，我會怨人類。

香港硬筆書畫會新春團拜

噚日朝突然接到 Carmen 電話叫我一齊參加一個書畫會聚會，初時以為只係普通聚會，一心去只為睇老師們示範，原來係團拜，喺北角某酒樓筵開八圍，除咗老師們示範之外，少不免仲有抽獎，抽獎禮物中有90%係書畫，書畫會亦兼顧周到，即使抽唔到也有禮物，務求每一位都玩得開心，而呢啲書畫禮物亦全部出自老師們手筆，呢個畫會嘅會員似乎寫字的多，畫畫的比較少，令我比較意外的係有多位老師寫篆書，我仲以為係甲骨文，因為字體跟我見過的篆書完全不一樣，原來老師話係大篆，最終我抽到兩張字，一張係大篆，一張係行書，始終冇人寫楷書。

枱上左下角紅色封面的係“余寄撫書畫作品集”，我見到佢哋有將書名紀錄在獎品名單內，但成晚我又唔覺有拎出嚟抽，555555~~~~

令我最最意外的嘉賓，我的偶像，余寄撫老師，高齡 91，仍然可以站立寫字，利害，噚晚又做咗小粉絲，有偶像示範，厚住面皮求來一張字“隨緣”，兩次都係無心插柳之下遇到老師，亦係一種緣吧！
余寄撫老師的字“隨緣”

余寄撫老師示範“飛龍在天、萬事如意”。

現場獎品之一，胡大池老師隸書

一則八卦，話說我企喺一張山水畫前細看時，Carmen 朋友(L君)同我講話呢張畫係作者已經題咗字送俾佢，我正留心睇老師們示範之際，無意中轉頭見到有人收起呢張畫，一心以為係 L君叫人幫佢收好，到L君搵畫時我至知原來有人落格，L君最後可以取回作品，聽講解釋係拎錯，因為作者又畫咗一張差不多嘅送俾呢個人，但我全程目睹作者同呢個人嘅互動，所以我完全唔接受呢個解釋。

唔通畫畫真係要講天份？

話說一班同學裏我差不多係年資最小的，所以每當小師妹有問題時，我大都唔會加意見，因為有師兄教，但當睇到師兄教小師妹畫樹，教到上氣唔接下氣(教咗好多堂都畫唔掂)，上一堂我終於忍唔住教埋一份，心諗，今次掂喇掛，誰知~~~~~小師妹拎返嚟嘅功課依然故我，嗰陣，我就明白每當師姐們讚我啲樹畫得靚時~~~~
我：我都係照稿抄嘅啫。
師姐們：係人都抄稿架啦！

我當時不明所以，又唔係自己創作，都係照住張稿抄啫，冇理由我得你哋唔得架喎，原來真係有人唔得。

又話要準備七月畫展，噢~~~~~~

新春賀圖

呢張畫原本係去年年中畫展參展用，但裱畫時被店家彈到一文不值而作罷，今日心血來潮找出呢張圖片，用小畫家提字加埋蓋章作春節賀圖用，祝大家身體健康！

PS：其實我真係好鍾意呢張畫㗎！

契媽辛辛苦苦捱到六十幾都係靠自己，仲要身處一個大家庭長輩級，又要維繫整個家族嘅和諧，就呢十幾年至享吓仔福，即使如 cat cat 話契媽活在當下，夫復何求，但我仍然希望佢身體健康，多享幾年仔福。

拎出阿仔嘅BB相，噢，都係廿多年前啫，竟然同老媽啲舊彩色相同一命運，但亦留意到一個以前甚少注意嘅問題，自從細佬傑傑出世之後，阿仔嘅笑容一次比一次牽強，睇到我好內疚，係咪多咗細仔之後疏忽咗佢呢？

傑傑滿月時，阿仔啲笑容幾咁燦爛，記得我一出院回家，阿仔就即刻擺架車仔喺細佬床頭，佢可能諗，真好，終於有人陪我玩喇。

傑傑約六個月大。

傑傑應該有一歲多，阿仔直頭可以用愁眉深鎖嚟形容。

我的小時候

好似男扮女裝的那一個就是我喇！旁邊的小女孩比我小半年，是不是好可愛、好かわいーね ，自覺由小到大都不曾靚過，尤其是相片中這個年紀就跟男扮女裝無異，可惜我不是男仔，老爸和七叔兩兄弟總共有七個女兒，記得祖母臨死那一刻都在問我七叔生的是男的還是女的，老人家總想有男孫繼後香燈，而我們的下一代差不多全都是兒子，只有琪琪一個是女的。

今日去契媽家，佢話成日發夢以前啲人、事、物，我咪又係一樣成日懷舊？我話前幾日去西環，我問佢軒尼斯道舊居個大鐘，大家講起以前怎樣怎樣，而家有佢同我想當年，但如果佢都走埋又有邊個陪我懷舊？佢成日話點解仲唔死，佢唔要老人痴呆，我又何嘗想佢走？更何況佢而家冇病冇痛，但如果佢被病痛折磨我又於心不忍，佢走咗，又冇人陪我想當年，所以佢以前成日叫我生多一個，希望係女就有人陪我，就好似我而家陪佢咁，世事豈會盡如人意。

生日宴半日遊

廖太(わたし)生日宴，其實圍內只餘一位廖太，其他的(包括我自己)早已經XXX太幾次，成日以為圓玄仲有菊花展，一心諗住映菊花，點知過期，一場去到，周圍是但映啲啦！
映完相兩點半返到荃灣至醫肚，再搭地鐵過海，呢一程去西環搵“山市街”以前住過嘅地方，因為轉咗東涌線，喺香港站出嚟盲頭烏蠅搵電車路搭叮叮，其實應該一出地面就直往西環方向行，過咗西港城就有叮叮，行咗好多冤枉路。搬離西環三十幾年冇返過“山市街”，久遺了“永泰大厦”，雖然附近多好多新樓，幸好未到面目全非，但係咪我靜慣咗，呢度人又嘈，車又嘈，起樓打樁又嘈，好嘈呀！

今日做咗大鄉里，一直問路：
第一次問路，喺荃灣問警察叔叔有否巴士直達堅尼地城，然後警察叔叔都搖搖頭話唔係太清楚，叫我搭地鐵。
第二次問路，喺山市街問一個阿伯，點解冇咗上蒲飛路嗰條山路，以前我頂住大肚子日日行上總站搭23號落北角學裁剪，阿伯唔係幾 “SO”我，後來又問一個大嬸，今次好好多，大嬸講到唔停口，要我提佢佢有朋友等緊佢至捨得走，大嬸其實大我冇幾多，但我就叫佢大嬸，唔怪得佢朋友面口有啲燶燶地，但都係一句稱呼啫，原來當年我行嗰條係私家路，為免有意外要負刑責而封路。
離開山市街再往西走，開始搵車去銅鑼灣，但卑路乍街係單程西行車，反方向巴士站就唔知邊度有，行行重行行，離遠見到電車迴旋處，噢~原來已經去到堅尼地城電車總站，又原來總站不遠處就係海旁，海旁有幾個類似碼頭物體，太陽西下，真係要起程去銅鑼灣囉~

陳社渠師兄出席雅集示範

今日放學後畫會雅集由陳社渠師兄示範，師兄是老師眾多學生中年資最老的，在中大進修國畫已有三年。

陳社渠師兄示範中

何良師兄捐出 $500 給畫會買下示範作品。

短短廿多分鐘可以完成八八九九，真係要好好學習。

呢幾日番睇“朴龍河”嘅“ON AIR”，唉~~除咗可惜之外真係唔知講乜好，點解韓國藝人咁興自殺架，仲要留低胃癌晚期嘅老爸，係一時衝動？

落葉鳳凰木

路過一棵冬天落晒葉嘅鳳凰木，腦裏自自然浮現如果要畫一棵一樣嘅，喺我嚟講就真係大工程大製作(即係冇可能喇！)放假放矇咗，成日諗住仲可以偷懶多一星期，但原來下星期就要返學，噢~~~功課未做晒 TIM~~~~