我的小時候

好似男扮女裝的那一個就是我喇！旁邊的小女孩比我小半年，是不是好可愛、好かわいーね ，自覺由小到大都不曾靚過，尤其是相片中這個年紀就跟男扮女裝無異，可惜我不是男仔，老爸和七叔兩兄弟總共有七個女兒，記得祖母臨死那一刻都在問我七叔生的是男的還是女的，老人家總想有男孫繼後香燈，而我們的下一代差不多全都是兒子，只有琪琪一個是女的。

今日去契媽家，佢話成日發夢以前啲人、事、物，我咪又係一樣成日懷舊？我話前幾日去西環，我問佢軒尼斯道舊居個大鐘，大家講起以前怎樣怎樣，而家有佢同我想當年，但如果佢都走埋又有邊個陪我懷舊？佢成日話點解仲唔死，佢唔要老人痴呆，我又何嘗想佢走？更何況佢而家冇病冇痛，但如果佢被病痛折磨我又於心不忍，佢走咗，又冇人陪我想當年，所以佢以前成日叫我生多一個，希望係女就有人陪我，就好似我而家陪佢咁，世事豈會盡如人意。

生日宴半日遊

廖太(わたし)生日宴，其實圍內只餘一位廖太，其他的(包括我自己)早已經XXX太幾次，成日以為圓玄仲有菊花展，一心諗住映菊花，點知過期，一場去到，周圍是但映啲啦！
映完相兩點半返到荃灣至醫肚，再搭地鐵過海，呢一程去西環搵“山市街”以前住過嘅地方，因為轉咗東涌線，喺香港站出嚟盲頭烏蠅搵電車路搭叮叮，其實應該一出地面就直往西環方向行，過咗西港城就有叮叮，行咗好多冤枉路。搬離西環三十幾年冇返過“山市街”，久遺了“永泰大厦”，雖然附近多好多新樓，幸好未到面目全非，但係咪我靜慣咗，呢度人又嘈，車又嘈，起樓打樁又嘈，好嘈呀！

今日做咗大鄉里，一直問路：
第一次問路，喺荃灣問警察叔叔有否巴士直達堅尼地城，然後警察叔叔都搖搖頭話唔係太清楚，叫我搭地鐵。
第二次問路，喺山市街問一個阿伯，點解冇咗上蒲飛路嗰條山路，以前我頂住大肚子日日行上總站搭23號落北角學裁剪，阿伯唔係幾 “SO”我，後來又問一個大嬸，今次好好多，大嬸講到唔停口，要我提佢佢有朋友等緊佢至捨得走，大嬸其實大我冇幾多，但我就叫佢大嬸，唔怪得佢朋友面口有啲燶燶地，但都係一句稱呼啫，原來當年我行嗰條係私家路，為免有意外要負刑責而封路。
離開山市街再往西走，開始搵車去銅鑼灣，但卑路乍街係單程西行車，反方向巴士站就唔知邊度有，行行重行行，離遠見到電車迴旋處，噢~原來已經去到堅尼地城電車總站，又原來總站不遠處就係海旁，海旁有幾個類似碼頭物體，太陽西下，真係要起程去銅鑼灣囉~

陳社渠師兄出席雅集示範

今日放學後畫會雅集由陳社渠師兄示範，師兄是老師眾多學生中年資最老的，在中大進修國畫已有三年。

陳社渠師兄示範中

何良師兄捐出 $500 給畫會買下示範作品。

短短廿多分鐘可以完成八八九九，真係要好好學習。

呢幾日番睇“朴龍河”嘅“ON AIR”，唉~~除咗可惜之外真係唔知講乜好，點解韓國藝人咁興自殺架，仲要留低胃癌晚期嘅老爸，係一時衝動？

落葉鳳凰木

路過一棵冬天落晒葉嘅鳳凰木，腦裏自自然浮現如果要畫一棵一樣嘅，喺我嚟講就真係大工程大製作(即係冇可能喇！)放假放矇咗，成日諗住仲可以偷懶多一星期，但原來下星期就要返學，噢~~~功課未做晒 TIM~~~~

每月的雅集

呢個月請咗蔡潔明老師出席雅集並示範，只因為有老師示範所以放學後留堂都要參加，雅集喺我哋上課嘅中心舉行，上午上課下午雅集，滿懷期待，最終失望而回，無其他原因，就係覺得呢位老師太市儈，即使賣畫為生都唔係問題，但出晒通告有示範，佢反口話收唔到信，又趕時間所以冇打算示範，但又不斷問我哋攞名片，我哋成班同學唔係退休人士，就係無業遊民，邊會有名片呀！最終喺會長同其他幹事遊說之下佢係咁而畫咗一棵松樹，會長叫佢送一張完整嘅畫俾我哋畫會留為紀念，但佢始終唔肯動手畫埋佢，驚死我哋拎去賣，我覺得既然答應示範就應該好好的教，有問必答至係，而唔係好似佢咁，不斷以手掩住個口陰聲細氣地帶我哋遊花園，有啲會員又掛住講嘢，變成我同佢雖然只隔三個身位都聽唔到佢講乜。
本來佢帶咗兩本有關佢作品嘅4r照片簿俾我哋睇，我一睇，弊~~我嘅至愛“工筆山水”，噢~~可以俾我細心慢慢睇就好，但開會期間越聽越唔對路，氣憤之餘連相都唔睇，冇晒心機，以我嘅死脾氣一定做唔到畫會裏有 title 人士。

照片下右方頭戴白帽戴眼鏡人士就係佢。

象鼻山完成圖

完成一張水墨的象鼻山，雖然知道仍有許多地方要執，但眼高手低，怕弄巧反拙而就此作罷，整體來說是近半年來個人比較滿意的一張。

上兩星期老師叫我帶佢張畫回家照住畫，唉~~我邊畫到丫，果然不出所料，圖，照住畫沒問題，用色，遠~~~遠~~~遠~~~遠~~~未係嗰皮，雖然同學們都話幾好，但喺我眼裏直頭可以用“一塌糊塗”嚟提字。

老師的畫

再畫另一張，但今次用嘅方法就係我習慣嘅方法，呢張畫未畫完，但起碼我係邊畫邊知道點樣繼續，之前嗰張跟足老師，於是變成邊畫邊有舊雲喺我頭頂跟到實，不知從何著手，始終用色係我最弱嘅一環。

冇錯，又係大嶼山

不過今次係四個家庭，一行十二人，浩浩蕩蕩，行程緊密，約咗9：30喺東涌車站等，擾攘一輪決定買“大澳通”套票，$110 一位包單程䌫車+巴士當日任搭，約十一點去到大佛，先去心經簡林，1：20pm.坐 大澳巴士去“靈隱寺”食齋，呢條巴士線比較疏，一個鐘一班，所以一定要準時，“靈隱寺”食齋後再入大澳巡例走一圈，妹夫嘅妹夫大出血，我哋就空手而回，約五時離開，呢條線好啲，十五分鐘一班車，噚日可能遊人太多(手信街簡直插針唔入)仲有加班車添，又熱又開心嘅一日咁又玩完，勀C人啊！

360䌫車

喺䌫車上回望機場

喺䌫車上遠眺大佛

北大嶼山郊野公園，好多人行山，連小朋友都有啊！

Julie 生日禮物─臨于非闇墨水仙

真係唔好意思， Julie 的生日禮物要回流補鑊，事緣係我忘了點花蕊就送咗俾佢，難怪我畫完裱完之後拎住張畫總覺得怪怪的，晚宴回家途中至諗起，係喎~未點花蕊呀！

呢張生日禮物又係準備咗個幾月，一年多冇畫工筆，鈎線時真係手“蕂”腳震，畫咗好幾張至有一張稍稍好啲，原畫係墨水仙，但又怕因為太久冇畫工筆，於是嘗試用顏色遮一遮醜，後來發覺唔多靚，於是又再畫過，呢一次跟原畫畫墨水仙，雖然我畫得唔靚，但唔知係咪我嘅偏愛，我都係鍾意墨水仙。

我的至愛，墨水仙。

上個月有人提議不如替畫會設計一個網頁，可以放會訊通告之餘，會員又可以放自己的作品讓其他會員品評，好提議，我隨即提出用 blogger，因為 blogger 可以小組形式而且免費，但當然堂堂一個畫會用 blogger 會稍嫌不夠華麗，但我亦懷疑有幾多會員會上網看通告，由我第一次參加畫會的雅集(只此一次)開始就發覺，畫會仍然沿用最守舊的郵寄來互通訊息，我不要求大家都懂上網，但大家都擁有手機，為何捨手機短訊不用，而用郵遞呢？這邊說畫會沒資金，所以網頁也要作廢，那邊又浪費紙張、油墨、金錢(郵票)，意見已提出但沒被接納，當然我一個沒 title 的是人微言輕，而且時常這樣那樣會惹人討厭也說不定。

最新通告：直到有電腦專才入會才打算為畫會設立網頁。

言下之意是，這個專才要剛好喜歡國畫而入會、懂設計網頁之餘還要有時間打理網站、可以日日守在電腦前做義工。

我奇怪的是，所有在畫會裏有 title 的都是義工，不是嗎？

舊照片

廖太們記得否？02年哦~~~~眨吓眼又九年半囉~

大澳

大澳呢個場景大家都唔會陌生喇！

喺關帝古廟嗰條路直行到尾，再過埋楊侯古廟前往狗伸地觀景亭途中，有一個建築廢料堆填區，阿仔走出去映雀，呢度完全冇異味又好清靜，如果唔係滿地都係破璃碎的話，其實真幾靚。

狗伸地觀景亭，第一次行到咁遠。

靈隱寺

阿仔生日想去靈隱寺食齋，連同好好姨一行四人喺東涌搭11號往大澳嘅巴士，喺總站前一個站落車，靈隱寺路口有一個涼亭供遊人稍稍休息。

步行約十五分鐘就可到靈隱寺

貼一張師兄的扇子崖之晨解畫

針對亞四嘅問題，以我所知(未做過實驗)，如果想表達正午，就唯有喺光暗位表達(光位唔會用紅色)，亦唔會突兀地畫一個紅太陽，畫紅太陽係用嚟表達朝陽或夕陽，咁成張畫嘅光位會用暗紅色，師兄就最鍾意畫呢類背景嘅畫，貼一張上星期師兄的功課，畫上冇畫太陽，但光位就用咗朱磦(橙色)去表達晨曦。
師兄李國譽─扇子崖之晨

兩張梅花

上星期交咗呢張功課，師兄話花太細，回家後加多兼加大花朵，但依然覺得有點不自然。

上星期老師冇修改梅花功課，但就畫咗另一張月夜下的梅花，呢一張就係這個星期嘅功課，老師加咗勁多枝椏，下方將兩棵梅花連接一起，畫面即刻自然得多。

大鄉里出屯門市中心─迷路 ing~~

喺屯門住咗十幾年，喺市中心“葡”咗十幾年，今日竟然迷路，哈~~~

約咗畫班同學仔喺美孚早茶，之後一個人落屯門買 under，再唔買就全部變晒 T-back 喇，去到屯門吉之島，嘩~嘩~嘩~裝修完之後二樓連入口都做埋舖位，終於搵到入口，但裏面啲 counter 又全部走晒樣，行晒二樓全場都搵唔到內衣部，口在路邊要問食蕉叔叔，原來搬咗落一樓，以前擺床上用品嗰個位，嘩~~內衣部駛唔駛搞到咁“up dup”呀，幾種品牌堆埋一齊，多個人行都阻手阻腳，算，拿拿聲買完走人。

雖然十一點幾至嘆完早茶，但點幾又開始餓，十幾年冇幫襯過新墟嗰間粥舖，粥舖旁嘅金舖又冇埋，但警車依然好盡職日日駐守喺呢個位，只因成條街都係金舖。

去西鐵站途中嘅新墟街市，又係久遺了十幾年囉~

新墟街市旁的仁愛堂，以前阿仔喺度學游水，有暖水池架~
遠方興建中嘅建築物位置前身係“新發邨”，而家係樓高四十層嘅住宅~

自家製禮物袋

自家製禮物袋，因為搵唔到啱大細又啱心水嘅布袋，又諗可否用禮物紙做一個，點知樓下文具店冇我想要嘅禮物紙，買咗呢種比較硬嘅網狀包裝材料，絲帶原本係買嚟綁蝴蝶結，又因為網狀材料太硬，用雙面膠紙都唔掂，唯有用絲帶一味靠黐，終於做到袋形，但點封口呢？如果可以整個紐扣就好，靈機一觸諗起之前7仔嘅吊飾，搞掂。
至於 Connie 嗰個，因為唔係自家製，自動忽略。

其實今次禮物早於兩個月前就開始諗，見到阿仔砌俾女友嘅音樂盒，又係靈機一觸，女士們日常返工都有好多手飾，咁就不如整個 lego 盒仔啦，當然呢堆 lego 都係拆散咗嘅盒裝 lego，如果用嚟砌咗其他嘢咁就砌唔返原裝嗰副，但呢堆材料平時分類放好又唔係砌，實際上冇乜用，但如果要砌起嚟再買料又會好貴，總之就係“雞肋”一堆，雖然砌好盒仔，但最終都冇送俾廖太。

體操世錦賽男團決賽，中國隊在對手出現較多失誤的情況下奪冠，雖然說是僥幸，但眼看日本隊接連不斷的失誤，可否說成中國隊的心理質素還是高一點點。
再翻看一下這次世錦賽的新聞，裁判壓分，連日本隊主將內村航平賽後坦承中國隊遭遇了裁判壓分。陳一冰的吊環難度高達6.8，成套動作表現穩定、下法站住，卻只拿到了15.466分，日本隊兩人掉杠，仍舊有偏高的14.266和14.700分，偏幫都唔好做得咁明顯啦！