濕地公園教學篇

稻 ──估唔到而家要喺公園至見到稻，以前新界一望無際都係稻田嘅景觀已經一去不復再。

殘荷──令我諗起之前睇過吳冠中畫展，其中嘅“殘荷”，原來荷花即使枯萎亦只有頂部會垂下，枝桿仍然畢直向上，難怪佢用嚟形容不屈不朽、堅毅向上精神。

以下都係從來未見過嘅植物。

燈心草

茭白荀

馬蹄

枸杞

西洋菜

擬明唐寅山水

因原作圖片睇唔清楚，所以我畫呢一張嗰陣己經簡化咗，但畫嘅時候都畫到死吓死吓，畫完後再睇返又覺得似幼稚園功課，老師叫我唔好畫“唐寅”嘅畫，可能係我未夠班掛，佢話我會畫得好辛苦，但我畫呢張嗰陣我樂在其中喎，老師叫我摹擬清朝“四王”嘅畫，前幾日摹擬“王時敏”嘅畫，仲死多幾錢重，老師，我畫啲A3 size 嘅就 OK 啫 ，“四王”嘅畫大多係大畫，好難兼顧啊！

清明上河圖電子動態版

晨早十點第一場，原來落車後到展館入口都有好長一段路，還好我哋早咗好多去到，而且因契媽以輪椅代步，所以又可以唔駛跟大隊，用另一個入口，仲可以優先入場，於是就有以下照片嘅畫面，任我點映都得~~~

未夠鐘入場時，回望排隊人流已覺好多人，但原來都末有五分一，入場後還陸續有來，一場觀眾會有三千，到後半段時間就覺展館內空氣唔係咁好。

因為有走豬呢一段，所以最多人圍觀嘅係虹橋，但我錯失漕船過橋底呢一幕。

罕有地帶兩個相機，CANON & 阿仔嘅RICOH GX100，貪佢係 24 WIDE，又因自己呢個只得一GB，轉吓眼咭就已滿，阿仔嘅又唔係咁識用，忽發奇想，將佢部機嘅HC SD咭放喺我部機，初時怕我部機太舊支援唔到，但又得喎，哈~~搞掂~~

清明上河圖電子動態版短片

追豬小孩

小心火燭

騾和小孩

日間搖櫓

夜間漕船上歌舞

駱駝商隊

整理相簿後感

剛整理了相簿的權限，原來 07 年是我外遊最多的一年，相繼有正月到盤龍峽三天、五月到北海道+大阪九天、八月到台北五天、十一月到廣州探七叔，順便到烈士陵園的一天，還未算本地的大澳、赤柱(謝謝亞四相陪)、、山頂(謝謝亞四相陪)、、長沙灣北九龍裁判署(謝謝亞四相陪)、海防博物館(謝謝亞四相陪)、花展、濕地公園等等，這個 07 年真算多采多姿，08 年好歹也去過北京和澳門，09 年無論是本地還是外地，一概欠奉，今年，只勉強到過台北和清遠，前些時候阿仔整理他的玩具時，我想我的旅行喼以後用的機會是微乎其微，於是順便讓他安放他的 lego 大人仔 ，這個大人仔體積一點都不小，喼小一點不行，人仔大一點也不行，就剛剛夠安放在喼裏，總好過吉喼一個沒用處。

bread aubrey

擬師兄作品

師兄作品“月暗籠輕雪”，想畫要做底色嘅山水畫好耐，實在太鍾意師兄呢張畫，上星期借咗返嚟照住畫。

我的，化到七彩，本來要留嘅光位全部被掩蓋，月光又唔夠圓，失敗之作，或者題字為“天狗食日”咁就貼切喇！55555~~~再畫過。

擬明 仇英 楓溪垂釣圖軸(批改前後)

非常的不自量力地拎起大師畫作嘅圖片就試畫，原作非常非常複雜，我畫唔到，又想試畫船仔，喺我改頭換面下於是變成現今模樣，但亦畫得唔好，石頭唔得、樹唔得、人仔更唔得，但畫嘅過程好開心，上課至知原來呢種就係我一直想畫嘅工筆山水，難怪~所以，最緊要開心~鍾意點畫就點畫啦！
老師因為唔係工筆出身，所以只係口頭叫我如何改動，但我話唔緊要，拜託佢改一下下方嘅石頭，心諗反正呢張只係功課，遲早都係益垃圾箱。
老師批改前

老師批改後

“撞墨”批改前後

一張“撞墨”嘅實習作，上一堂老師教完後回家就試，但撞出來嘅效果完全唔係嗰回事，墨化唔開，撞完墨後落石綠時又怕唔夠，落完一次又一次，石綠化唔開時又嘗試用撞墨嘅方法去化開顏色，原來呢種就叫“撞彩”，最後老師話太綠喇，但點解墨會唔化呢，原來墨唔夠濃，紙亦有少少關係，一於姓賴。

老師問：想大改定少改？
我答：有得大改梗係大改啦。
“撞墨”批改前

“撞墨”批改後，即刻立體晒~

臨摹和創作的問題

以下文字都屬拾人牙慧，紅色字體為論壇裏爭吵的問題：
中國畫為什麼要承傳，如何承傳？
通過臨摹學習了不少大家之精髓，30臨摹、40臨摹。50還臨摹？那麼如何才能創作出美好呢？學習他們繪畫的什麼？當年他們的繪畫技法又從哪來的呢？

臨摹是學習古人、前輩們的繪畫技法，先掌握技法這東西，連臨摹的技法也掌握不好，又如何創作呢，寫生是繪畫的基礎和靈魂，像我這些業餘愛好者，沒有一點寫生基礎，怎麼去寫生呢？在論壇看了整整十五頁的討論，然後得出自己的結論 ：
如何承傳？ 因為我不具備那個智慧，所以自動忽略。
學習他們繪畫的什麼？不知道，只知道畫得開心就好。
當年他們的繪畫技法又從哪來的呢？ 不知道，只知道臨摹得相似又畫得開心就好。

只是憑興趣畫畫當做休閒娛樂的我，根本沒有成名的想法，臨摹也好，寫生也好，半臨摹半創作也好，覺得怎麼開心怎麼畫，開心就好。

紀念張大千誕辰111週年學術研討會暨藝術精品展─藝術精品類 II

紀念張大千誕辰111週年學術研討會暨藝術精品展─藝術精品類 I

紀念張大千誕辰111週年學術研討會暨藝術精品展─其他畫家

劉海栗

董誥─雪夜歸吟圖(59X165CM)

宋文治─嘉陵帆影(2.6平方尺)

紀念張大千誕辰111週年學術研討會暨藝術精品展─繼續張大千

呢張因為放喺玻璃櫃內，要避開天花嘅燈光，所以角度好斜。

紀念張大千誕辰111週年學術研討會暨藝術精品展─張大千

噚晚廖太壽宴，今次五點就去到銅鑼灣，先去晒畫展時同老師、同學等等映嘅相，等候攞相期間，正在為去中央圖書館或旭屋之間心大心細，好耐冇去中央囉，都係去中央喇，喺中央旁天橋向下望，咦~有展覽喎，順便睇睇先，一行到入口見到“紀念張大千誕辰111週年學術研討會暨藝術精品展”，哎吔吔，一定要拍拍自己腦袋，明明前兩日睇到電視新聞架嘛，但就冇件事，仲要冇帶相機呀，嗚~~~~冇法，阿四又未放工，唯有用只得810 萬像素嘅手機啦，回到家搞一餐，啲顏色仍然唔多自然，有好幾張仲鬆郁朦乜都齊，先貼主角“張大千”的：

張大千─荷塘圖(181X94CM)

張大千─桃溪獨釣(180x90cm)(呢張我最鍾意)

張大千─墨荷圖(133X67.5CM)

張大千─雪落孤舟一蓑翁(134X32CM)

張大千─漢高窟唐人菩薩像(190X66.5CM)

張大千─重彩荷屏士女(92X57CM)

張大千─春山訪友圖(120.5X38CM)

張大千─松下論詩(16X124CM)

張大千─松下高士撫琴圖(126X46CM)

張大千─松下高士(102X51CM)

張大千─太華西峰雲起圖(134X54.5CM)

一張構圖東湊西併的合成畫

因為係幾張圖併合一起，所以老師話有啲各自為政嘅感覺，還好老師已經將中間空白位拼命加上大量雲霞，咁至好少少，其實唔夠時間畫，否則呢張畫嘅構圖亦唔係而家咁【吉】，起碼遠山嘅山間和中距離嘅石上會加上小樹，亦會將遠山部份延長用以填補中間空白部份，左邊樹叢還要加上大量小樹，因為上色後墨色會減退少許，所以最後還要用濃墨重新鉤勒深暗位，而呢張畫我係第一次用赭石染樹葉，都唔係太差，下次試吓畫夕陽下嘅石頭。